ISL champion thar East Bengal

Kum 22 chhung teh meuh eng title mah hlawhchhuak zo tawh lo East Bengal FC chuan a vawi khatna’n Indian Super League title an hlawhchhuak!
Ningani zan khan Kolkata khawpuia Kishore Bharati Krirangan stadium-ah Mizo tlangval rualkhat – Edmund Lalrindika, Lalchungnunga, Vanlalpeka Guite, Lalramsanga leh David Lalhlansangate telna Bengal hian 2-1-in an mikhual Inter Kashi an hneh a, Kolkata club lian dang Mohun Bagan Super Giant nen point 26 ve ve hmu tling mah se goal difference-a an chungnun zawkna hmangin East Bengal kutah ISL title a lut ta zawk a ni.
Indian top-tier competition trophy hi season tawp hnaih dawn thleng khan thuang ngain an la inchuh bar bar a, Bagan, Mumbai City FC, Punjab City leh Bengaluru FC-te hmakhalh fai vek chungin a tawpah Kolkata giants pakhat zawk East Bengal FC an dingchang ta a ni.
Ningani inkhel dangah chak mamawh ve tho Mohun Bagan chuan Yuba Bharati Krirangan stadium lamah 2-1 bawkin Sporting Club Delhi hneh ve bawk mah se goal difference-a an hniam zawkna khum zak tur khawp goal an thawnlut zo lo a, league match 13 ve veah Bengal nen an point hmuh inzat mah se goal difference-a an hniam zawkna avang chauhin title a tawlh liam ta a ni!
Fixture final round dangah Mumbai FC pawhin Punjab FC lakah 2-0 hnehna chang ve tho mah se Lallianzuala Chhangte leh a pawlte hian East Bengal an lehthal zo ngang lo a; Odisha FC leh Jamshedpur FC erawh inkhel dangah goal inpe loin an inthathen ve thung.
ISL champion hlui pahnih Mumbai City leh Bengaluru FC-te chu pathumna leh palinaah an intlar thla.