Israel Adesanya a kir leh dawn

UFC a fighter hriat hlawh leh hlawhtling ber ber zinga mi Israel Adesanya chu a chawl hman zet naa fight hmachhawn leh turin kir leh a rilruk.
UFC middleweight champion hlui Israel Adesanya hian March 28, 2025-ah Joe Pyfer laka a tlawm hnuin UFC a chawlhsan zui nghal. Mualpho taka a ropuina thin UFC a thlahliam hnuin a lungleng thar leh a, Octagon-ah fight hmachhawn leh turin kir a tum a, hnehna nen ngei hmingtha taka UFC chawlhsan ngei a tum dawn.
Fighter tha tak ni thin Adesanya hian kum 2010 khan UFC a luhchilh tan. 2025-a a chawlh thlengin fight vawi 29 hmachhawnin vawi 24 a chak a, tlawm zawkah vawi 5 atang. A hneh tak a khingpui 24 zinga 16 zette hi knockout hmanga a hnehte an ni. Kum 2020-2022 chhung khan middleweight a thunun tha viau. Middleweight-ah a vawk lal len laiin Brazil fighter tha zet mai Alex Pareira a rawng lang. Pareira nen hian tum thum kawnghren an inchuh a, Adesanya hi tlawm zawkah tum hnih a tang. Pareira laka a tlawm hnuhnun ber atangin chak ni hmel a hmuh ta miah lo hial a ni.
New Zealand fighter Adesanya hian middleweight kawnghren inchuhnaah vawi riat hnehna a chang a. He huangah bik hian kawnghren inchuhnaa chak tam pahnihna a ni a, a chungah hian title fight a vawi 11 hnehna chang Anderson Silva a awm. Middleweight thunun hneh viau thin mah se chhe takin a tawp a khar tlat thung a, fight a hmachhawn hnuhnung pathumnah a tlawm vek. An weight ranking-a 15-na American Joe Pyfer a hneh loh vangin a hma lam hun turah zawhna lian ak a awm nghal a. Rinlawk ang ngeiin UFC a chawlhsan zui nghal.
UFC a chawlhsan hnuin fight ngaihven hlawh leh hmuhnawm tak takte pawh in lam atanga thlirin, Youtube lamah reaction a tichhuak thin. Fight hmachhawn thang, fight hmachhawn tura inbuatsaih reng mai thin a ni a. Han awl tak veng veng mai chu a hrethiam hleithei meuh lova, lunglen a reh hleithei meuh lo. Kum khat em pawh a chawlhtlin hmain fight hmachhawn a, hnehna chang leh turin kir zai a rel leh ta a ni.