Israel-Hamas inbe zui mek

Gaza Strip-a inkahhai puan a nih theihna tur leh mi hrente chhuah an nih theihna tura inbiakna huaihawttute chuan chhunzawm leh an tum mek a, Israel leh Hamas te pawhin inremna lam hi an hawi tan bawk.
Palestinian hotu sang pakhat chuan indona a chhuah hnua a vawi khat nan Israel leh Hamas aiawhte chu building pakhatah awmin mi dang kaltlang (indirect)-in an inbe dawn tih BBC a hrilh.
Hamas hian Israeli sipaiten Strip chhuahsan ngei an phut tel thin pawh kawng dang deuhva tih an tum tih a sawi bawk.
US President Joe Biden chuan inremna hi ‘a hnai’ tih sawiin inbiaknain rah tha a chhuah dawn thu a lo sawi tawh a. Israeli thuneitu pakhat pawhin inremna chu ‘darkar reilo te emaw, ni emaw, a aia hla deuh zawkah emaw’ a awm dawn tih a sawi thung.
Hetianga inkahhai puang tura inremna awmtir tum thar lehna hi US president ni tawh mai tur, Donald Trump-a’n January 20-a lak luh a nih hmaa inremna a awm lo a nih chuan a pawi hle ang tia a vaukhan hnua tharthawh leh a ni.
Biden-a pawhin Pathianni khan Israeli Prime Minister Benjamin Netanyahu a bia a, inbiaknaa kaihruaitu ber, Sheikh Tamim bin Hamad Al-Thani, Qatar chu Thawhtanni khan a be bawk.
Palestinian thuneitu pakhat hian Hamas leh Israeli thuneitute hi building pakhatah awmin darkar ruk chhung mi dang kaltlangin an indawr dawn tih a sawi.
Inremnaa telh tur thenkhat pawh a sawi a, ‘sawihona erawh chuan hun a la mamawh deuh thei’ niin a sawi bawk.
An pahnih hian inremna siam ni hmasa berah Hamas-in an mi hren pathum chhuah ve ve an remti tawh a, hemi hnuah hian Israel pawhin mihring chen tamna lama sipai a dahte chu an la chhuak ve hret hret ang.
Ni sarih hnuah Hamas hian mi dang pali an chhuah leh ang a, Israel pawhin chhim lama tlanchhiate chu hmar lama an kir leh a phalsak ang a; mahse, ke chauhvin, tuipui kam hrul zelah chauh an kal phalsak a ni ang.
Car, sain a hnuh tawlai leh truck te erawh Salah al-Din Road zawhtir phal an ni ang a, Qatari-Egyptian technical security team-in an buaipui X-ray machine-in endik vek zel an ni thung ang.
Inremna atana duanah hian a thawh khatna, ni 42 chhung awh tur chhungin Israeli sipaite chu Philadelphi corridor-ah an awm zui zel ang a, khawchhak leh hmar lam ramri metre 800-a thui buffer zone an awmchilh rih bawk tura tih a ni.
Israel hian Palestinian 1,000 chuah zalen an tum bawk a, hetah hian kum 15 chuang an lung ina an lo hren tawh 190 vel an tel dawn bawk a. Hemi thleng nan Hamas hian an mi hren 34 an chhuah ve bawk ang.
Inremna tura inbiak thawh hnihna leh thumna chu inkahhai puan ni 16-na atangin an tan ang.
Doha-a inbiak meknaah hian Trump-a Middle East envoy, Steve Witkoff pawh a tel.
Israel Foreign Minister Gideon Saar chuan inbiak mek a nih thu leh a hmaa inremna tura duan aiin tuna mi hi a tha zawk niin a sawi a. Hetih lai hian inremna tura inbiakna kalpui danah Netanyahu-a chuan sorkar a siampuite lak atangin lungawi loh deuhna a tawng nual mek.
Right-wing member 10, Netanyahu-a kaihhruai Likud party-a mite pawh telin, inkahhai atana inremna chu an duh lo tih lehkha an thawn tawh.
Indona hi Hamas-ten October 7, 2023-a Israel chhim lam beia mi 1,200 an thah leh mi 251 zet Gaza-a hren tura an hruai atanga intan kha a ni a. Israel hian phuba lak nan Gaza rûnin Hamas chhut chimih a tum zui.
Gaza-a Hamas enkawl health ministry chuan mi 46,500 an thi tawh niin a sawi a. Israel chuan Gaza-ah mi hren 94 an la awm niin a sawi a, an zinga 34 chu an thi tawh mai thei tih a sawi a, Israeli pali, indona chhuah hmaa hrente pawh an thi tawh niin a sawi.
Gaza-ah hian thil a chhe nasain mipuiin an tuar hle a. Medecins Sans Frontieres hotu, Amande Bazarolle chuan inkahhai tura inbiak mek a nih lai pawhin Gaza hmun hrang hrang, chhim lama Rafa leh Khan Yunis leh hmar lama Gaza City te chu kah a la ni reng tih a sawi.
Bazarolle-i hian inkahhai hi puang mah se thil tha a thlen zui a rin loh thu a sawi a. “Ni tin mamawh chu a awm belh a rinawm chuang lo,” a ti.