Israel-in civil mite chenna a beihah mi 29 thi

Israel-in civil mite chenna a beihah mi 29 thi
Israeli-ten thlawhna hmanga Gaza City-a mi chenna in chhawng sang an kahnaah 29 vel an thi niin tual chhung damdawi inin a sawi.
Hamas enkawl Civil Defence agency chuan indo thlawhna hmangin Thawhlehni tuk khan Shejaiya venga al-Hawashi mosque bul beih a ni tih a sawi bawk.
Thi zingah naupang pariat an tel a, mi 60 chuangin hliam an tuar a, chhanchhuah hna thawktuten in chim kara tang mi thahnem tak an la zawng bawk.
Israeli sipaite chuan ‘Hamas firfiak hlun tak’ an kah thu an sawi thung a, amah hi heng lai vela mi beihna ruahmantu niin an sawi.
Civil miten an tawrh lohna turin ruahmanna hrang hrang siam a ni a, ‘tum tak fuha thil dang tichhe tam lo tur ralthuam’ hmanga beih a ni tih an sawi bawk.
Sipaite hian Hamas hian dan palzutin civil mite zingah chengin inphen nan an hmang niin an sawi bawk.
Shejaiya-a video an lak thehdarhah chuan naupang la te tak tak, vaivutn a bawh khah vekte an chhungte leh chhanchhuah hna thawktuten an pawm sawn laite a lang.
Thawhlehni zing lamah khan Gaza-a Hamas enkawl health ministry chuan a hma darkar 24 liam taa Israeli-te chetnaah mi 33 vel an thi tih a sawi bawk.
March 18-a Israel-in thlawhna atang leh leia Hamas a beih thar leh hnuah mi 1,482 an thi tawh.
Chawlhkar thum liam ta chhungin mi 3,90,000 vel chu awmna tur mumal nei lovin an awm leh hman a, Gaza hmun thuma thena hmun hnih vel zet chu Israeli sipaiten ‘kal phal loh’ emaw, inthiar chhuahna hmun tur emaw an tih huangah a tel tih UN chuan a sawi.
UN chuan Israel-in Hamas nawr chep nan puihna pek an phal loh avangin ei tur, damdawi leh tuialhthei a awm lo vek tawh tih a sawi bawk.
Thawhlehni khan Secretary General António Guterres chuan Israeli-ten kawngpui an dang chu demin khawvel dan bawhchhiatna a nih thu a sawi.
“Gaza hi inthahna hmun leh civil mite thihna khur a ni,” tiin a sawi.
Israeli foreign ministry chuan Guterres-a’n a sawiselna chu chhangin, “Ni 42 inkahhai chhungin Gaza Strip-ah hian puihna phur truck 25,000 chuang a lut a. Hamas hian heng thil hi indona khawl atan an hmang a ni,” tiin an thupuangtu, Oren Marmonstein chuan a sawi.
Palai hna thawktute chuan January 19-a tan inkahhai chu chhunzawm a nih leh theih dan tur an dap zel bawk a. Inkahhai chhung khan Hamas hian Israeli an hren 33 chhuahin an zinga pariat chu an thi a, Thai panga an chhuah bawk a. Israel-in Palestinian mi an man 1,900 chuang chhuahin Gaza-ah puihna a lut bawk.
Israel hian Hamas-in inkahhai thawh khatna an puan pawh sei rawtna a duh loh avang leh mi hren 59 chhuah zui a duh loh avangin a bei thar leh niin a inchhal a, mi hren zinga 24 hi la dam nia hriat an ni.
Hamas hian Israel-in inkahhai awmna tura inremna siam an bawhchhe zawk niin a sawi ve thung a. An kalpui danah chuan thawh khatna zawhah thawh hnihna kalpuiin mi hren la damte pawh chhuah vek tur leh indona pawh tihtawp vek tawh tur a ni.
Israeli sipaite hian October 7, 2023-a Hamas beihna an tawh, mi 1,200 thata mi 251 hren tura an hruai phuba lak nan a bei zui a. Hemi hnuah hian Gaza-ah hian mi 50,840 an thi tawh a ni.