Pakistan-in Afghan 8,000 chuang thawn haw
Pakistan chuan an rama Afghan awmte haw vek tura a tih hun chu kar hmasaa a tawp hnuah tihluihnain 8,000 chuang an thawn haw tih thuneituten Nilaini khan an sawi.
Afghan Citizen Card (ACC) neite chu March 31-ah haw vek turin an ti a, September, 2023 atanga dan lova an rama awmte um chhuah beihpui an thlak kal zelah thapui an thawh mek a ni.
April 1 atang khan Afghan raltlan 8,115 chu Afghanistan-ah Torkham border crossing kaltlangin an hawtir.
“Hmun hrang hrang atanga man khawm an ni a, a tam ber hi Punjab-a mite niin Afghan thuneitute hnenah hlan an ni,” an ti.
Punjab province-ah hian beihpui pawh thlak nasat zual a ni a, ni tin Afghan raltlan za tel man an ni a, an nihna finfiah a nih hnuah centre hrang hrangah hruai khawm an ni a, Torkham kaltlangin an thawn haw ta thin tin an sawi.
Punjab sorkar pawhin Afghan mi 5,000 chuang an province hmun hrang hrangah man tawhin an ramah an hawtir tih an sawi ve bawk.
Thuneitu sang pakhat chuan venhim hna thawktu pawl hrang hrangten Punjab-ah hian dan lova Afghan awm 1,00,000 chuang an awm niin an sawi tih a sawi a. Heng mite hi an chhui zui zel a, dan ang tak lehkha an nei lo a nih chuan an thawn haw zel tih as awi.
Sindh province-ah pawh Afghan tam tak man an ni a, thawn haw an ni bawk.
Tun tum hi ACC neite thawn haw thawh hnihna niin a thawh khatna atan September, 2023 khan dan lova an rama awm tam tak an lo thawn haw tawh.
Thawh kkhatnaah hian Afghan chhungkaw 70,494, mi 4,69,159 chu Torkham kaltlanga thawn haw an ni a. Ramri kânna hmun dang danga thawn hawte nen an zavaia hemi tuma Afghan hawtir hi mi 8,00,000 chuang an ni.
Ram pumah police-in dan lova Afghan awmte vai hna an thawk a. Thuneitute hian Proof of Residence card leh ACC chu finfiahna atan an hmang a ni.
Afghan-te hi kum 1980 vela USSR ram ni thinin an ram a rûn atang khan Pakistan-ah hian an lut tan a ni.
Pakistan-in Afghan 8,000 chuang thawn haw
Get real time updates directly on you device, subscribe now.