Israel-in Gaza a beihna uar tial tial

Israeli indo thlawhnate chuan Gaza Strip bei zui zelin chawl lovin beihpui an thlak chhunzawm zel a.
A hma lawkin US chuan United Nations-in Gaza-a humanitarian cease-fire a awm theih nana resolution a siam chu ram tam ber leh security council member ten an thlawp chungin hnawlin a veto sak a. Council a vote lakah 13-1 lai niin United Kingdom pawh a hai a ni.
“Vansang, lei lam leh tuipui atanga beihna a nasa zual zel a ni,” tiin UN Secretary-General Antonio Guterres chuan vote lak hmain a sawi a. Gaza-a chengte chu ball ang maia ngaih niin insawn tura hrilh rengin an awm, a ti bawk a.
Guterres chuan Gaza chu chhe vek thei dinhmunah a ding tawh tia sawiin humanitarian support system te a tluchhe vek tawh a, tun ang renga thil a kal a nih chuan helai bial pum security atana pawi thei a ni a ti bawk.
Gaza-in Israel leh Egypt nena inrina a neih ramrite chu khar vek niin hei vang hian Palestinians te chuan inhumhimna khawiah mah an nei chuang lo. Gaza-a palestinian nunna chan tawh zat chuan 17,400 a chuang tawh a, heng zinga a tam berte hi hmeichhia leh naupangte an ni tiin Hamas thununa Health Ministry chuan a sawi.
Israel chuan Hamas-te chu civilian te thihna chanah puhin inphen nan a hmang a ti a, civilian ten an tawrh loh nan chhuak tura hriattir lawkna a pek thu a sawi bawk a. Indona thlen hnu atangin Israel pawhin sipai 93 a chan tawh a ni.
Kar kalta Inrinni khan Israel sipaite chuan Gaza City a mipui bitna hmuna Shijaiyah school-ah Hamas ralthuam dah that an man thu an sawi bawk a. A bul lawkah leiverh luhna hmuhchhuah a nih thu an sawi bawk a. Beit Hanoun a UN enkawl school atang pawhin Hamas te chuan Israel te an beih thu an sawi bawk.
Gaza hmar lam leh chhim lam, Rafah khawpui Egyptian border hnaiha awm pawh indo thlawhna hmangin beih an ni tho bawk.
Gaza Health Ministry chuan Gaza chhim lama damdawi In pahnihah Israel bomb avanga nunna chan 133 darkar 24 chhungin an awm tiin a sawi bawk a.
Israel chuan Gaza hmar lam Hamas-te bit leh tamna chu lak ngei tumin a bei mek bawk a, indona a nasa hle a ni. Israel-in evacuation order a siam chungin khua leh tui sing tel tak meuh meuh chhuak duh lo an la awm a ni.
Kar kalta Inrinni khan Kibbutz ah Hamas te mitâng man kum 25 a upa Sahar Baruch chu a thi a. Amah kidnap-tute chuan Israel sipai ten chhanchhuah an tumna lamah a thi an ti. Israel sipaite pawhin chhanchhuah an tumna lamah an hlawhchham thu leh a sipai pahnih ten hliam an tuar tiin a sawi bawk.
December 1-a inkahhai tumna a hlawhchham hnuah Palestinian nunna chan 2,200 an awm tawh a, heng zinga a tam ber hi hmeichhia leh naupangte an ni tiin Gaza Health ministry chuan a sawi a.
“Ka ril a tam a ni” tiin Mustafa al-Najjar, UN enkawl school a awm mek northern Gaza-a Jabaliya refugee camp-a awm chuan a sawi a. “Canned food leh biscuit chauh kan ring,” tiin a sawi.
Puitlingte chuan riltam chu an teithei mai a. “Mahse, kan fanu leh fapa la naupang tak tak te riltama an tap chu tawrh a har a ni,” tiin a sawi bawk.
Khawvel ram hrang hrang ten an nawr chungin Biden administration chuan inkahhaina siam a la thlawp duh tlat lo bawk a, Hamas te chu Israel te tan hlauhawm an la ni zui zel dawn a ti a ni.
“Israel hnenah engmah hun tiam siam kan nei lo, kan tihtur pawh a ni lo,” tiin US deputy national security adviser Jon Finer chuan United Nations Security Council a US-in inkahhai tumna a veto hma ni lawkah a sawi a.
Israeli Defense Minister Yoav Gallant pawhin ‘inkahhai siam nih chuan Hamas-te chu lawmman pe ang kan ni ang a, hmun hrang hranga terror group te signal pekna a ni’ tiin a sawi.
Arab ram leh Turkey foreign minister te chuan Washington kalchilhin US chu inkahhai a awm remti turin an ngen a. Jordanian Foreign Minister Ayman Safadi pawhin Secretary of State Antony Bliken chu hmuin Israel chetlakna chuan helai region dinhmun a tiderthawng a ti bawk.
Turkish Foreign Minister Hakan Fidan pawhin US-in veto a hman chuan Washington dinhmun a tarlang a ti a. “American political system hi Israel kaihhnawihah a hmantlak loh. Chuvangin Israel chuan insumkarna nei lovin chet a la zui zel a ni,” tiin Fidan chuan a sawi.
Fidan mai bakah Palestinian, Saudi, Indonesian, Egyptian, Jordanian, Qatari leh Nigerian Ministers te chuan Blinken hmuin indona tihtawp a nih theih nan an kar a, blinken bakah hian Canadian Prime Minister Justin Trudeau leh Foreign Minister Melanie Joly te pawh an hmu tel bawk.
Inkahhai siam zuia lung in tang inthleng tawn hnua indona chhunzawm a nih leh hnuah US chuan Israel chu civilian-te himna nasa zawka ngaihtuah turin a lo ti tawh a.
Israel chuan chhim lama Muwasi -ah safe zone a siama chu chu tuipui kam hrul maia awm niin mahse hmun zau a nih loh avangin Palestinians te chu an tam lutuk tawh tia sawi niin hun rei lo te hnuah hri pawh leng thei a ni an ti bawk.