Israel-in Gaza nasa zawkin bei zui zel

Israel chuan Gaza khawpui lian ber dawttu a bomb chu nasa zual zawka kalpui chhunzawm zelin hei vang hian thi leh hliam tam tak awmin damdawi in te chu a khat hneh hle a ni.
US nawrna avangin Israel chuan southern Gaza a beihna chu fimkhur zual zawka a kalpui thu a sawi. Mahse, Palestinians te chuan khawi lai mah him a awm lo ti thungin an chenna in an chhuahsan a nih chuan an let leh phalsak an ni ngai dawn lo an ti bawk.
Vansang atanga beihna leh lei lama a beihna avangin Gaza a mihring 2.3 million vela hmun thum emaw hmun lo emaw vel chuan an chenna an chhuahsan tawh a. Khan Younis chhehvela chengte chhuak tura tihna avangin mipui tam takte chu hmun zim teah an inhnawh nguk tawh bawk.
Khan Younis a Nasser Hospital ah chuan hliam tuar tam tak phurh luh niin enkawl sen loh damlo an awm mek a ni.
“Thil thleng mek hi suangtuah ngam chi pawh a ni lo,” tiin Hamza al-Bursh, thenawm maia cheng Israel-in an khua chuahsan tura a tih zinga mi chuan a sawi a. “Chin tawk nei lovin Israel in tha a thawh mek a ni,” tiin a sawi bawk.
Airstrike nasa taka Khan Younis khawchhak lama Bani Suheila beih a nih hnuah Israel sipaite chuan an thlenchilh zui nghal bawk a. “Israel sipai ten min hnaih hle tawh a ni,” tiin he khuaa cheng Halima Abdel-Rahman chuan a sawi.
Israel hian tank ringawt pawh 150 a tir lut a, chubakah indona vehicles leh armoured personnel carriers thahnem tak a tir lut tawh bawk.
Israel chuan northern Gaza-ah pawh indo tan tirhah mipuite chhuak tura lo ti tawhin chhuahsan tawh te chu an let leh a remti lo bawk a. Chhim lamah pawh Khan Younis leh a thenawm khuaah te mipuite chu insaseng turin a lo ti lawksa tawh bawk a.
“Gaza khawi hmunah mah him a awm lo, khawiah mah kalna tur a awm chuang lo” tiin Lynn Hastings, UN humanitarian coordinator for the Palestinian territories chuan a sawi a. “Gaza mipuite chhawmdawlna tur tanpuina pek luh theih a ni lo. Tun aia nasa zawk dinhmun chhe zawkah pawh an la awm thei,” tiin a sawi.
Israel thung chuan October 7-a Hamas tena indona an kalpui ang kha a thlen tawh loh nan Hamas te military infrastructure zawng zawng chu tihchhiat vek a tum thung a. Hamas leh Palestinian militants te chuan October 7 khan Israel bei thutin mi 1,200 chuang nunna lain mi 240 an man bawk a ni.
Israel sipaite chuan civilians te chu khawih loh hram an tum thu sawiin mahse Hamas te chuan inphen nan an hmang tlat a ti ve thung a, Israel puhna hi Hamas te chuan an hnawl thung a ni. Mipui chen bitna hmunah hian Hamas te chuan tunnel, bunker tam tak an nei thung.
Inbeihna nasa tak karah kar kalta khan lung in tang inthleng tawnna siam niin Israeli leh foreign hostage 100 Hamas ten chhuahin Israel chuan palestinian lung in tang 240 a chhuah ve thung a ni.
Indona avang hian nunna tam tak hlohin a awm tawha coastal strip-ah tihchhiat a neih chu namen lo a tling tawh a ni.
Gaza health ministry chuan October 7 hnuah nunna chan 15,890 an awm tawh a, heng zinga 70% lawih chu hmeichhia leh naupang an ni a, hliam tuar 42,000 chuang an awm tawh a ti bawk. Mahse, ministry chuan civilian leh sipai thi te a sawi hrang lo thung a. Inkahhai puan hnua indona tan leh hnuah pawh nunna chan leh hliam tuar tam tak an awm tawh a ti bawk. Israel pawhin indona avangin a sipai 86 a chan tawh thu a sawi bawk.
White House national security adviser Jake Sullivan chuan Israel operation dem nghal ngawt tur chuan a la hma lutuk a ti a, Israel-in a beih tur hmun sawia chuta cheng mipuite inthiarfihlim tura tihna pawh thil thleng ngai lo a ni a ti a.
A hmain Israel chuan Khan Younis-a chengte hmuh theih turin leaflet thlakin chutah chuan mipuite chu an sahim nana Egypt nena ramri chhim lama kal turin a lo ti tawh a. Mahse, an chenna chhuahsan theia siamin an awm lo va, a chhan ber pawh Israel leh a thenawm Egypt te chuan refugee an dawn duh loh vang a ni.
Israel-in mipuite inthiarfihlim tura a tihnaah hian chenna in 1,17,000 a awm a, hmar lam atanga raltlan 50,000 chuang awmna pawh a tel tiin UN chuan a sawi.