BJP parliamentarian 12 ten banna an thehlut

Union Ministers Narendra Singh Tomar leh Prahlad Singh Patel te chuan Lok Sabha member an nihna atangin December 6 khan banna an thehlut a. BJP te chuan tun hnaia State assembly-a thlan tlin MP 12 te chu Parliament member an nihna atanga bang vek turin a ti a ni.
Hetiang a nih avang hian tun hnaia BJP te chakna state pathumah chuan party leadership thar a awm dawna ngaih a ni a. Mahse, BJP senior leader te chuan engmah sawi an la nei duh lo thung.
BJP president J.P. Nadda chuan Parliament member bang zinga 10 te chu banna an thehluhah a tawiawm a. Union Minister dang pahnih Renuka Singh leh Mahant Balaknath te pawh an bang zui ang tiin party leader te chuan an sawi.
MP bang tate hi Rakesh Singh, Udya Pratap Singh leh Riti Pathak, Madhya Pradesh; Kirodi Lal Meena, Diya Kumari leh Rajyavardhan Singh Rathore, Rajasthan bakah Gomati Sai leh Arun Sao, Chhattisgarh te an ni.
An vai hian Meena tih chauh loh chu Lok Sabha member vek an ni a. Meena hi chu Rajya Sabha member a ni thung. Patel chuan prime Minister Narednra Modi blessing hmua bang vek an ni tiin a sawi.
Union Minister pathumte pawhin formality zawmin Modi sorkar mek atangin an bang bawk ang a. Tomar hi Cabinet minister agriculture portfolio chelhtu niin hetia an banna hian titi siamin Modi chuan kum 2024 Lok Sabha inthlan hmain council of Ministers thar a la lut ang em tih chu inrinsiak mek a ni.
Tomar leh Patel, Other Backward Classes ni bawk hi Madhya Pradesh bikah Shivraj Singh Chouhan telin Chief Minister ni thei tia sawi an ni a. Chouhan hian kum 2005 atang khan Chief Minister nihna a chelh tawh a, kum 2018 khan Congress sorkar Kamal Nath kaihhruai thla nga a awm thung.
Rajasthan-ah pawh party leadership chuan MP bang ta zinga la naupang zawkte chu Chief Minister atan an thlang dawn tih a awm a, veteran leader Vasundhara Raje pawh chief minister ni thei a ni a, CM thlan turah political factor bakah social equation chu ngaih pawimawh a ni dawn tih a ni bawk.
Kum 70-a upa Raje hi Chief Minister term hnih chelh tawh a ni a, mahse, party national leadership te nena an inzawmna a tha lutuk lo tia sawi a ni.
OBC mi leh sa Sao leh Scheduled Tribe Sai pawh an social background vangin CM atana contender an ni a, chumai bakah an la naupang dun zawk bawk. Anni bakah hian kum 71-a upa Chief Minister tum thum ni tawh Raman Singh hming pawh sawi lan a ni chungin mahse BJP leadership chuan naupang zawk an awn dawn tia sawi a ni.
Prime Minister Modi-an tun hnaia hmeichhia, thalai, rethei leh loneitute heng thil palite hi a ngaih pawimawh ber tia a sawi chuan thutlukna siamna kawngah kori a tu hle dawn tia sawi a ni bawk.
Lok Sabha inthlan thla nga hnu lekah a awm dawn avangin BJP te chuan Chief Minister an thlan danah social agenda an kalpui dan tur a lang mai dawn tih a ni bawk a. Heng bakah hian inbuktawk a awm theih nan Deputy Chief Minister pawh an nei mai thei tih a ni bawk.
BJP-te chuan Hindi tawng hmanna state pathumah te hian chakna an chang vek a. Congress te nen an inbei viau chungin Madhya Pradesh-ah pawh two-third majority an chang a, Congress rorelna Chhattisgarh leh PM Modi theihtawpa guarantee nena a campaign-na Rajasthan pawh an chhuhsak a ni.
Heng state pathumte hi nakum lawka neih tur Lok Sabha inthlanna atana pawimawh tak tura ngaih a nih avangin inthlan hmaa campaign lai pawhin BJP te chuan Union Minister rual tirin an thutchilh bur a ni.