Israel-in Gaza nasa zawkin bei

Israel chuan Pathianni atang khan Gaza chu nasa zawka bei leh tanin Hamas-run territory ah hian Hamas te nena inkahna a nasa hle a, chutihlaiin Hamas enkawl Health Ministry chuan nunna chan 35,000 an chuang tawh a ti.
Israel-Hmas indona thlasarih chuang kalpui tawhah UN chief Antonio Guterres chuan arang thei ang bera inkahhaina siam ni se, mitang zawng zawng tiamkamna tel hauh lova chhuah nise, humanitarian aid Gaza Strip-ah thawnluh nghal ni se tiin ngenna a siam zui a.
“A pawimawh hmasa ber chu inkahhai a ni” tiin Guterres chuan Kuwait a donor conference neihnaah a sawi a. “Indona in chiatna a thlen atanga insiamthatlehna kawng chu a thui dawn” tiin a sawi bawk.
Egyptian, Qatari leh US palai tena inkahhai a awm theih nana hma an lakna chuan rah tha chhuah thei meuh lo va. US President Joe Biden chuan karkalta Inrinni khan Hamas tena Israeli mitang an kawlte an chhuah zalen a nih chuan an chhuah zalen tukah inkahhai a awm nghal ang tiin a sawi.
Israel chuan northern, central leh southern Gaza te chu zan lamah nen indo thlawhna leh missile hmangin a bei zui bawk a.
Gaza Health Ministry chuan darkar 24 chhungin nunna chan mi 63 an awm tia sawiin tihian Israel-in Gaza a beihna avanga nunna chan mi 35,034 an awm tawh a ti bawk a. Nunna chan zinga a tam ber te chu hmeichhia leh naupangte an ni a ti bawk.
Israel chuan northern Gaza a Hamas command centre chu an chhut chhiat tawh thu a sawi a. Tun hnaiah erawh Jabalia refugee camp leh Gaza city a Zeitun ah inbeihna a nas a hle thung.
Israel military spokesman Rear Admiral Daniel Hagari chuan tun hnaiah Hamas te chuan Jabalia leh a chhehvelah an military dinthar that leh tumin hma an la nasa tih kan hria a, chu chu tihchhiat kan tum a ni tiin a sawi.