Israel in Hezbollah a beih chhunzawmnaah UN hmun bei tel leh

Israel in Hezbollah a beih
chhunzawmnaah UN hmun bei tel leh
Pathiannia Israel sipaiten Hezbollah ho an beih chhunzawmnaah Lebanon chhim lama awm UN inkulhna an bei tel leh a, hei hi tum thum UN muanna sipaite an beih telna a ni tawh.
UN secretary general Antonio Gutterres chuan khawthlang ramte inbeihna avanga muanna sipaiten an tawrh phah leh thin chu pawi a tih thu leh a dem thu a sawichhuak nghal a, nunna chan an awm lo hlauh thin erawh lawmawm a tih thu sawiin, remna kawng zawh dan ngaihtuah hram hram turin a ngen nawn leh bawk.
France chuan an rama Israel ambassador kaltlangin inbeihna tihtawp dan ngaihtuah rang tura a duh thu a thawn nghal a, hei hi Italy leh Spain te nen pawh an duh dan a nih thu a sawi. US president Joe Biden chuan UN inkulhna chu zah a, muanna sipaite pumpelh zawnga chet lak tum hram hram turin Israel chu a chah ve nghal bawk a ni.
Israel sipaiten inrinni atanga Gaza lam an beihnaah Palestinia mi 29 in nunna an chan tawh a, Lebanon lamah hian chhiarsen loh nunna chan an awm tawh bawk niin Lebanon sorkar chuan a sawi.
UN hian inkahhai puang turin a nawr reng a, muanna sipaite hi Lebanon chhim lamah hian sing khat vel an awm mek a ni.
Israel chuan muanna sipai bulah hian Hezbollah helho an chet tlat nasat avangin inven sen a har hle niin thuchhuah an siam a, UN chu an hmun sawn turin an lo ngen tawh thin a, UN lam hi la ngawiin, hmasawnna a la awm thei rih lo thung.