Israel-in Iran nuclear hmun pawimawhte a bei

Israel-in Iran nuclear hmun pawimawhte a bei
Israel chuan Zirtawpni tuk khan Iran hmun hrang hrang a kap a, Iran-in nuclear programme a neiha ‘hmun pawimawhte’ a bitum tih a sawi.
Iran chuan ‘nakin lawkah a beih let’ rin a ni a, Israel chuan emergency a puang nghal.
Iran-a sipaia thiltithei tak, Islamic Revolutionary Guards chief Hossein Salami pawh thi zingah a tel niin Iranian sorkar chanchinbuin a puang a, nuclear scientist-te pawh an thi tel.
US chuan Iran-a nuclear enrichment facility lian ber beihnaah hian inhnamhnawihna an nei lo tih a sawi.
Iran khawpui, Tehran-ah chuan zing dar 03:30 (India-a zing dar 08:00) velah thil puak ri hriat tan a ni a. Sorkar chanchinbu chuan mihring chenna lai pawh kah fuh a ni a, Tehran hmarchhakah pawh puak ri hriat a ni bawk.
Israel-ah pawh mi chengte chu an muttui laiin air raid siren tihrik ve nghal niin emergency phone alert pawh an dawng hlawm.
Israel sipaite chuan ‘Iran hmun hrang hrangah nuclear sawngbawlna hmun telin sipai hmun kah a ni’ tih an sawi.
Darkar eng emaw zat an kah hnuah Tehran chhim lam km 225 vela hla, Natanz nuclear facility-ah pawh thil puak ri a awm niin Iranian sorkar chanchinbuin a sawi.
Israeli Prime Minister Benjamin Netanyahu chuan Operation Rising Lion tia an sawi beihpui thlaknaah hian ‘Israel dam khaw chhuahna tura hlauhawm ni thei Iranian an hnungtawlh theih nan sipaite an che’ tih a sawi a. Beihpui an thlak chu an la chhunzawm dawn niin a sawi bawk.
Iran sipai thupuangtu chuan US leh Israel chuan he thil thleng chhan letna ‘na tak’ an dawng dawn tih a sawi niin Reuters chuan a tar lang a. “Sipaiten Zionist beihna hi an chhang let dawn,” tiin Iranian thupuangtu, Abolfazl Shekarchi chuan a sawi.
US Secretary of State Marco Rubio chuan an inrawlh loh thu leh puihna pawh an pek loh thu a sawi a. An ngaih pawimawh ber chu heng laia American sipai awmte himna a ni tih a sawi.
Iran hian nuclear programme a neih chu mipui hman tur chauh a ni tih a awi a. A hmun pawh tam tak an nei a, Israel hian thenkhat a kap a. Tehran hian him takin thil kalpuiin insawi mah se ram dang leh IAEA thlengin rinhlelh a hlawh.
Israel Defense Forces (IDF) chuan Iranian Armed Forces chief of staff, Islamic Revolution Guard Corps (IRGC) Commander leh Emergency Command Commander te chu ‘Iran hmun hrang hrang kahnaah an thi’ niin a sawi.
Iranian sorkar chanchinbu pawhin thi zingah hian IRGC commander-in-chief Hossein Salami, Khatam-al Anbiya Central Headquarters commander Gholamali Rashid leh armed forces chief of staff of Mohammad Bagheri te an tel niin a puang ve bawk.
Nuclear scientist pahnih – Fereydoon Abbasi, Iran-a Atomic Energy Organization chief thin leh an nuclear programmee-a inhnamhnawih thuk tak, Mohammad Mahdi Tehranchi te an thi tel tih a sawi.
Iranian Supreme Leader Ayatollah Ali Khamenei-a senior adviser Ali Shamkhani pawhin hliam na tak a tuar nia sawi a ni a, finfiahna a la awm lo.