Ram panga tlawh turin Modi-a a zin dawn

Indian foreign ministry chuan Thawhlehni khan thuchhuah siamin Prime Minister Narendra Modi-a chuan ram panga a tlawh dawn a, Zirtawpni atanga Nilaini thleng hian United Arab Emirates leh Europe-ah te a zin dawn tih a sawi.
Modi-a zin tur hi Middle East buaina avanga khawvel puma tuialhthei man a sang chho zel a, India foreign currency reserve a nghawng a neih laiin a ni.
Modi-a hian Zirtawpni hian UAE a tlawh dawn a, hemi hnu hian Netherlands, Sweden, Norway leh Italy-ah te a zin dawn niin sorkar thuchhuah chuan a tar lang.
Prime minister zin tur thu hi energy man sang chho zeln ram foreign exchange-ah nghawng a neih mek lai leh Modi-a’n tuialhthei renchem, rangkachak lei tlem leh lak luh tlem bakah zin chhuah titlem tura mi a ngen hnuah a ni.
Indian share hi Thawhtanni khan a tlahniam a, rupee pawh thla khat chuang chhunga a hlutna a tlakhniam nasa ber chu a tawng a. Modi-a’n inrenchemna tur ngenna a siam hnuah vek a ni.
Tuialhthei man sang hi a la lut nasa, India tan chuan hlauhawm tak a ni a, ram chhunga sum che vel nghawng, ram thanna tikhaihlak leh thil man a tihsan a hlauhawm thei hle a ni.
Modi-a leh UAE President Mohammed bin Zayed Al Nahyan-a chuan ram pahnih thila ngaihdan an inthleng dawn a, a bik takin energy lama thawhhona bakah ‘an chhehvel leh khawvel pum huapa harsatna awm chungchanga an ngaihdan an inhrilh tawn dawn tih thuchhuah chuan a tar lang.
Europe ram a tlawh kual tur hi India-in heng ramte nena sumdawnna leh investment lama a inzawmna thuk zawk siamna tur a ni dawn a, kumin kum tir lama India leh EU insumdawn tawnna inremna an siamte a taka tihhlawhtlin zelna tur dapna a ni nghal dawn tih foreign ministry thuchhuah chuan a tar lang a ni.