Israel-in Lebanon-ah a sipaite la awmtir zel

Israel-in Lebanon-ah a sipaite la awmtir zel
Israel chuan an tanhmun hmun nga tih loh Lebanon chhim lama an sipaite an la chhuak ta tih Lebanon sorkar news agency chuan a puang a. Israel inhnuhdawh hi Shia hel pawl, Hezbollah nen kum khat an indo titawpa inkahhai inremna an ziaha tel a ni.
Israeli minister-te chuan an sipai thenkhat chu Israel hmar lama an mite veng turin Lebanon chhungah an la awm dawn tih an sawi hlawm.
UN thuneitute chuan inkahhai ‘tihkhawtlaina’ tia sawiin ‘hetiang a thlen hi kan ring lo’ an ti a. Lebanon pawhin an duh loh thu an sawi bawk.
Inkahhai inremnaah chuan Israel hian an sipaite an hnukdawk vek ang a, an awmnaah Lebanon sipaite awmin helho hi chhim lam, Israel hmar lam km 30 chuanga hla, Litani River thlengin an tawlh bawk ang tih a ni.
Hezbollah chuan heng lai hmun hi kum tam tak an lo luah tawh a; mahse, kum 1982-a an pawl a din atanga Israel-in a beih nat ber tumah hian an inhloh nasa hle.
Lebanese thuneitute chuan indona a awm chhung khan mi 3,960 chuang, a tam ber civil mi an thi tih an sawi a, Hezbollah tamna hmuna cheng mi maktaduai khat chuang baihvaiin an awm phah tih an sawi bawk.
Israeli thuneitute pawhin Israeli sipai 80 chuang leh civil mi 47 an thi tih an sawi a. Israel hmar lama cheng mi 60,000 vel an tlanchhe bawk tih an sawi.