Israel-in Lebanon bei zel, Trump-a’n a duh lo

Lebanese sorkar chanchinbute chuan Pathianni khan Israel-in Beirut chhim lama beihpui an thlaknaah mi pathum an thi a, mi 15 an hliam niin an sawi.
Israel Defence Forces (IDF) chuan Dahieh-a Hezbollah-in ‘command centre’ atana an hman an beih thu an sawi a, Iranian-te thlawp ralthuam keng pawl hian ‘Israel lam hawia van sang atanga beihna’ an thlen chhan letna niin an sawi.
Thlalak darhah chuan building an kah leh a chhehvel chu a chhe hle tih a lang.
Iranian thuneitu sang chuan Beirut chhim lama Israel-te beihpui thlakna hian Iran leh US inbeihna tihtawp theihna tura inremna beisei chu a titawp thei niin a sawi.
US President Trump-a chuan a hnuah he pawikhawihna hi ‘a thleng tur a ni lo, a bikin Iran nena Peace Deal kan hnaih em em niah phei chuan thleng tur a ni lo’ tih a sawi.
Truth Social-ah, “Israel hian vauna laka inven theihna a nei a; mahse, an chhan let thil hi a tlemin awmze nei lo a ni a, tumah thi leh hliam pawh an awm lo va, kan thil kalpui pawimawh tak hi a tibuai tur a ni lo,” tiin a tar lang.
“Lebanon khawi hmun pawh Israel-in a bei tawh tur a ni lo va, Hezbollah telin pawl dangte pawhin Israel an bei tawh tur a ni lo bawk,” a ti.
“Remna rei tak leh mawi tak bul tanna a ni thei — I inbei tawh lo vang u!” a ti bawk.
Inrinni khan US president chuan US leh Iran chuan inremna chu ‘naktuk hian ziah tum a ni’ tiin a sawi a; mahse, Iran chuan a hun tur a sawi ve lo.
Israel-ah chuan thuneituten inremna hi an ram tana harsatna lian takah an ngai niin an sawi.
Israel hi inbiaknaah hian a inhnukdawk niin a lang a, Hezbollah chu a beih chhunzawm zel tur thu a sawi bawk a, hei hi an ram hmar lam an beihna chhan letna atan a ni.
US nena inbiakna neih mekah Iranian palai lawk, Mohammad Bagher Ghalibaf-a chuan Pathiannia Israel-in Dahieh a beih danah US-in a thutiam a hlen lohzia a lang niin a sawi ve mek bawk.
Iranian sipai hotu lian, Brig Gen Mohammad Jafar Assadi-a pawhin Beirut dai beihna hi ‘chhan lohvin’ a awm dawn lo tih a sawi bawk.
President Trump-a hi White House-a a awm chhung hian Israel thlawptu a ni a; mahse, Middle East-a buaina rei tak leh man to tak titawp tuma hma a lak mek laia Israel-in Lebanon-a a bei chhunzawm zel chuan a tibuai hle niin a lang.
Israeli thuneitute chuan Hezbollah laka buaina hi Iran-a buaina chhuak nen a hran niin an sawi a, an ramah hian Lebanon-a indona chhunzawm zel turin mipui thlawpna a awm tha niin an sawi.
Lebanon hi Israel leh US tang dunin Iran an beihnaah hian March 2 khan a tel ve tan a, Israel-in Iranian Supelre Leader an thah phuba lak nan Hezbollah hian Israel an bei a, Israel-in a chhang let ta a ni.