Israel-in Lebanon kap tel tan, Trump-a’n indonain a daih rei a ring

Israel-in Lebanon kap tel tan, Trump-a’n indonain a daih rei a ring
Israel chuan Tehran a bei thar leh a, sipai chakna a hman hi huang zauhvin Thawhtanni khan Lebanon-a Iran thlawp Hezbollah firfiakte pawh a kap tel a. US President Donald Trump-a pawhin Israeli sipaite nena Iran an beih chu chawlhkar eng emaw zat chhunzawm theih a nih thu a sawi vawk.
Hezbollah chuan Iran Supreme Leader Ali Khamenei-a thah a nih avanga phuba lakna atan Israel lam hawia missile leh drone an kahchhuah hnuah Lebanon-a Shi’ite Muslim Hezbollah firfiakte chu an kap leh ve nghal tih Israel chuan a puang.
Hezbollah-te thununna hnuaia awm, Beirut khawpui pawnah Israel hian thlawhtheihna hmangin beihpui a thlak a, Lebanon khawpuiah hian puak vawi 20 chuang a awm tawh a. Israel hian Beirut bul hnaia Hezbollah firfiak lawkte pawh a kap niin a sawi.
Kum 2024-a US-in inkahhai a puan hnuah Hezbollah leh Israel hi an inbei chhunzawm deuh reng tho va. Inrinnia US leh Israel tang dunin Iran an beih hnua Middle East-a buaina chhuak hian huang tizau thar lehin tuialhthei man pawh a sang mek zel a, thlawhna zin pawh a tikhaihlak nasa hle.
Israel sipaite chuan Hezbollah hian ‘inepna eng pawhah mawhphurtu pumhlum a nei’ tia sawiin, Lebanon khawthlang leh hmarchhak khaw hrang hranga chengte chu insawn chhuak turin an chah.
Thawhtanni zing dar 07:00 (India-a chawhma dar 10:30) hnu lawkah Israel pumah air raid siren tihrik a ni a, Tel Aviv leh Jerusalem-ah pawh Iran beihpui thlakna thar a awm thu hriattir a ni.
Iran sorkar chanchinbute chuan Thawhtanni tuk khan Iran laili atangin missile thar kahchhuah a ni tih an puang bawk.
Pathianni tlai khan Israel sipaite chuan an air force-te chuan Tehran beihna lakah van sangah an chungnung zawk thu an sawi a, khawpui hmun hrang hrangah beihna an tawhah intelligence, security leh military command center-te chu bitum a nih thu an sawi bawk.
Thawhtanni tuk khan Iran khawpui, Tehran hmun hrang hrangah bomb puak ri hriat a ni tih sorkar chanchinbute chuan an tar lang a. A hmutute chuan Dubai leh Qatar khawpui, Doha-ah bomb puak ri a awm bawk tih Reuters an hrilh.
Kuwait pawhin an air defence hmangin hmêlma drone-te an lo dang niin a sawi a, hei hi a zawna ni thum chhung Iran-in a thenawm Gulf state-te a beih let lehna a ni tawh.
Cyprus-a Britain Royal Air Force base Akrotiri pawh drone hmanga zankhuaa beih nia sawi a ni a; mahse, thi leh hliam an awm lo niin Cyprus thuneitute leh UK Ministry of Defense chuan Thawhtanni khan an sawi.
White House hotu lian chuan Reuters hnenah Trump-a’n Iran-a hruaitu thar awm thei turte a dawr mek lai pawhin sipai hmalakna erawh a kal zel dawn tih a sawi a, hruaitu thar tur awm ang erawh a sawi lo.
“President Trump-a chuan Iran-a hruaitu thar awm thei turte chuan inbiakna neih an duh thu an sawi a. Operation Epic Fury chu a la kal zel bawk,” a ti.
Iran President Masoud Pezeshkian-a chuan Pathianni khan amah, Judiciary hotu leh Guardian Council member pakhat awmna leadership council chu Supreme Leader hna chu chelh lailawk tura tih an ni tawh tih a sawi.
Thawhtanni khan X-ah Khamenei-a adviser thin, Ali Larijani-a chuan an ram chu Trump-a nen an inbe dawn lo tih a sawi a. US president hian ‘mi tihchhiat vek tumna’ a nei tih sawiin tunah chuan US tawrhna turin a tilungngai hle niin a sawi.
Indona kal meka US thi hmasa ber, service personnel pathum thihna te pawh Pathianni khan finfiah a ni a. US thuneitu pahnih, an hming tarlan duh loh chuan Reuters hnenah US service member-te hi Kuwait-a base pakhatah thah an nih thu an sawi.
Trump-a chuan ‘American ram hmangaihtu dik tak’ tiin zahna a hlan a, thi hi tam zawk an awm a rinawm thu a sawi zui bawk.
Indona hi rei zawk kalpui a nih chuan Trump-a Republican party tan politic-a risk lian tak ni dawn mah se Pathiannia video a tihchhuahah ‘kan thil tum zawng zawng tihhlawhtlin a nih’ hma chuan chhunzawm zel a nih tur thu a tiam.
“Beihpui thlakna hian tun thlengin Iran sipai thununna a tibo tawh a, Iran navy lawng pakua leh naval building pakhat a chhia,” a ti.
Inrinnia indona a intan atangin American thlawhtheihna leh indo lawngte chuan Iran hmun 1,000 chuang an kap tawh niin US sipaite chuan an sawi.
Trump-a chuan Iran sipai leh police, Islamic Revolutionary Guards Corps pawh indona titawp turin a ngen a, inpete tan zahngaihna pek a tiam a, dodaltute erawh chu an thih ngei tur thu a sawi a. Iran mipuite chu sorkar laka hel turin a ti nawn leh bawk.
“Iran hmangaihtu, zalenna duhtu zawng zawngte chu he hun hi hmang tangkai turin ka ngen a; huaisen taka awma in ram lak let leh turin ka ngen a ni,” tiin a video tihchhuahah a sawi a. “America hi i bulah a awm,” a ti bawk.
Chanchinbu hrang hrangten an kawmnaah Trump-a hian Iran laka sipai beihpui thlakna chu kar li tal an chhunzawm mai theih thu a sawi.
IRGC chuan Pathianni khan Gulf leh Strait of Hormuz-a US leh UK tuialhthei phur lawng pathum an kap tih an sawi a, Kuwait leh Bahrain-a sipai hmunpuite chu drone leh missile hmangin an bei bawk.
Tuialhthei leh boruakalhthei phur lawng za tam tak chu tuipui kamah an ding hlawm a, sumdawngte chuan Thawhtanni khan tuialhthei thlitfim loh man nasa taka a san a rinawm tih an sawi.
Indona avang hian Middle East-a tumhmun lian ber berte chu khar a ni a. Khawvela mipui tlawh nasa ber zinga mi, Dubai pawh tun hnaia thlawhnaa zinvahna buai lian ber zinga mi a ni.
Iran-ah kum 1989-a Islamic Republic dintu, Khomeini-a thih hnua a thlaktu tur tihfel hun rei zawng tur a la chiang lo.