Israel-in Palestinian-te insaseng turin ngenna siam

Israel chuan Hamas nena indona a kalpui mekah Gaza chhim lam chu sipai nen a luhchilh ta a, hetih lai hian civilian nunna chan nasa leh buaina chuan middle East zau zawk a nghawng hlauhna a lian hle thung.
Israeli tank leh armoured personnel carriers leh bulldozer te chuan Gaza chhim lama Khan Yunis khawpui Palestinian raltlante bit em emna chu an luhchilh a ni.
Israeli vehicles te chu Khan Yunis chhung km 2 vel an lut tawh a, al-Qarara khuaah an awm tawh tia sawi niin Israeli tank te chuan Gaza strip north-south highway chu an luah mek tia sawi a ni bawk.
Israel-in lei lam sipai leh tank te northern Gaza lama a tirh luh hnuah Palestinian civilian te chu an awmna chhuahsan tura ngenna vansang atangin leaflet a then darh chuai chuai bawk a.
Army-te chuan Gaza Strip-ah Hamas te beiin nasa zawkin hma a la dawn a ni tiin Israeli Defense Forces thupuangtu Daniel Hagari chuan a sawi a. “Hamas te tamna apiang kan luhchilh ang,” tiin a sawi bawk.
Qatar, United States leh Egypt te hmalaknaa karkhat chhung inkahhai siam a zawh hnuah kar kalta Zirtawpni atang khan indona chhunzawm leh nghal a ni a.
Gaza chhim lamah air strike a nasa tial tial tiin James Elder, United Nations children’s agency UNICEF thupuangtu chuan a sawi a.
“Intiamna a awm chungin Gaza chhim lam chuan hmar lamin an tawrh ang an tuar leh mek a ni,” tiin James Elder chuan a sawi bawk a. “Naupang leh nute tan a pawi a ni,” a ti zui bawk.
Israel chuan October 7-a Hamas ten a ram beia mi 1,200 chuang tihluma mitang 240 vel a lak hnuah Hamas te chu chhutchimih a intiam a ni.
Pathianni khan Israel sipaite chuan air strike round 10,000 vel an kalpui tawh thu sawiin Gaza militant te pawhin Israel lamah rocket an kap chhuak a, a tam ber erawh Israel-in a lo kap thla thung a ni.
Gaza Health Ministry chuan indona avanga Gaza Strip a civilian nunna chan 15,500 vel an awm tawha heng zinga 70% hi naupang leh hmeichhiate an ni tiin a puang thung.
Hmun him a awm lo
“Gaza-ah hmun him a awm lo” tiin UN High Commissioner for Human Rights Volker Turk chuan a sawi a. UN agency te chuan Gaza mipui 75 per cent vel 1.8 million vel chenna mumal nei lovin an awm mek, a ti bawk.
Israel sipaite chuan northern Gaza Strip inkahnaah a sipai pathumin nunna an chan belh tia sawiin tihian northern Gaza bika a sipai nunna chan tawh zat chu 75 a ni.
October 7 hnu atanga indona thlen hnuah leh Hamas tena an beihna avanga nunna chan zawng zawng te nen Israel chuan sipai 401 a chan tawh a ni.
Mitang inthleng tawn avanga inkahhaina siam zawk laiin Israel mitang 80 leh Palestinian mitang 240 an inthleng hman a. Anni bakah hian Thai leh ram dang mite pawh chhuah zalenin an awm bawk a.
Hamas-te hian mitang 137 vel an la kawl mek niin Israel sipaite chuan an sawi a. Hamas-te chuan inkahhaina ngelngheta siam a nih loh chuan mitang an chhuah zalen tawh dawn lo an ti thung.
Hamas tena sorkar an neihna northern Gaza chu air strike nasa zawka beih a ni tiin Palestinian news agency Wafa official te chuan an sawi bawk.
Israel chuan Hamas te chuan damdawi in leh civilian infrastructure pawimawh te chu sipai hmunpuiah an hmang a ni a ti a, hei hi Hamas te chuan an hnawl thung a.
‘Pawisawi lo thi hnem’
Israel thian tha ber United States chuan Gaza civilian-te him zawkna tura hmalak ngiatin Vice President Kamala Harris chuan ‘Palestinian pawisawi loin nunna an chan hnem lutuk’ tiin a sawi.
White House official te chuan United States chuan Israel chuan Gaza a civilian nunna chan an tlem theih nan theihtawpa hma a lak a rin thu a sawi a.
Israeli sorkar thupuangtu Eylon Levy chuan Hamas ten October 7 ah Israeli te bei lo se chuan tuna nunna chante hian an chan hauh lo tur a ti.
Israel chuan Thawhtanni khan Palestinian civilians te chu an chenna in chhuahsan hlen tura ngenin Gaza dinhmun chu a la khirh rih zel dawn a ti bawk a.
Palestinian te Gaza chhuahsan tura tih chu Arab world tana pawm theih a ni dawn lo thung. Kum 75 kaltaa Israel a pian khan Palestinian 760,000 vel lai chuan chenna hmun nei lovin an tla darh sarh ringawt mai a ni.
Israeli sipai thupuangtu Jonathan Conricus chuan, “Tumah chenna nei lova siam kan tum lo, tute mah khawiah mah dah khawm emaw tumna kan nei lo,” a ti a.
“Khua leh tuite indona hmun chhuahsan rih turin kan ngen a, Gaza Strip-ah humanitarian zone kan siam reng a ni,” tiin a sawi thung.
Indona chuan helai region-ah indona nasa zawk a thlen hlauhna a lian hle a, hetih lai hian US destryoer chuan Red Sea chung zawngah commercial ship te beih tum drone thahnem tak a kap thla tiin US Central Command chuan a sawi.
Yemen-a Iran thlawp Houthi rebel te chuan lawng pahnih beiin Israel lamah missile an kap bawk a, thla kalta pawh khan cargo vessel an man tawh bawk a ni.
Indona avang hian Israel-in hmar lama Lebanon nena inrina a neihna laiah pawh inbeihna a thleng bawk a. Lebanon atanga beihna chhan let nan Israel chuan laipuia a beihlet thu a sawi a, heng a beih te hi Iran thlawp Lebanese militant group hezbollah te an ni a ti.
Israel awp mek West Bank ah pawh October thla atang khan tharum thawhna a nasa chak hle bawk a ni.
Hetihlai hian UN chuan Israel-in mipuite an awmna chhuahsan tura a tih chuan philina leh buaina a thlen nasa tiin a sawi a.
Thuchhuah a siamah UNRWA chief Philippe Lazzarini chuan tui a vang em em tia sawiin israel sipaite chuan mihring 350,000 chawmtu desalination facility a dang tlat tiin a sawi bawk a.
South Gaza a damdawi in lian ber damlo 1,000 chuang awmna leh awmna hre lo mi 17,000 vel kawl mekna chuan mamawh a lakkhawm theih loh vang leh staff indaihlohna avangin derthawngin a awm mek a ti bawk a.
Lazzarini chuan indona chhunzawm leh chuan humanitarian operation a tibuai vek tia sawiin Gaza a tanpuina thawnluh pawhin harsatna a tawk nasa a ni a ti bawk a. Israel sorkar chu Gaza leh Israel inkalpawhna chu hawng leh turin a ngen bawk a ni.
United Nations chuan indona chu chhunzawm zel a nih chuan civilian-te tawrhna a nasa zual zel dawn tiin a sawi bawk a. Tun dinhmunah pawh civilian-te tawrhna chu namen lo a nih tawh thu sawi bawkin indona tihtawp a nih theih nana hmalak a pawimawh thu a sawi bawk.
Hetih lai hian Israel chuan Hamas te chu che thei tawh lo tura chhut chimih chu a tum ber niin Gaza-a hmun tin Hamas tena hmuna an neih tin te chu a thlurbing char char bawk a, a chhut chimih hma chu chawlh a tum lo bawk.