Israel-in Rafah area-a refugee camp bei, Hamas hotu lawk tihlum

Rafah area a refugee camp Israel in a beihna avangin mi thahnem takin nunna an chan tiin Hamas-run health minitry chuan a tarlang.
Southern Gaza Strip a bomb puahna hmunah hian kangmei a chhuak nasa hle bawk.
Israel Defense Forces (IDF) te chuan senior Hamas leader pahnih an target thu sawiin chung mite awmna nia an hriat chu an bomb tiin an sawi.
A hma lawkin Hamas te chuan Rafah atangin Tel Aviv chu rocket pariatin an kap bawk a, January thla hnua Tel Aviv long-range hmanga beih leh hmasak ber a ni.
Ni hnih kalta khan International Court of Justice chuan Israel chu Rafah a military operation a neih te titawp nghal turin thupek a lo pe tawh a ni.
IDF tena Rafah an beih hnua thuchhuah an siamah Hamas leader lawk pahnih Yassin Rabia leh Khaled Nagar te chu north-west Rafah a an awmna hmunah tihhlum an ni tiin a sawi zui nghal bawk a. IDF te chuan Hamas militant te chu pecision weapons hmangin an bei an ti bawk.
Hamas te chuan Israel beihna avang hian north-west Rafah ah Palestinian raltlan 35 in nunna an chan tiin a sawi zui ve thung a. Nunna chan zingah hmeichhia leh naupang te an tel a ti bawk a.
Nunna chan an la pung dawn ti bawkin Palestinian Red Crescent Society te chuan chhanchhuah hna an la thawk zui zel tiin sawi a ni bawk.
Israel in Rafah a beih hma hian Hamas te chuan Tel Aviv chu long-range missile hmangin Rafah atangin an bei a. Mahse, chung rocket te chu Israel air defence system chuan lo kap thla in field ah an tla thung a ni.
Karkalta Zirtawpni a International Court of Justice in Israel chu Rafah bei chhunzawm lo tura a ti chungin Israel chuan a bei chhunzawm zel a. Rocket hmanga Hamas ten tel Aviv an kap zui chuan Israel in an ram tana hlauhawm a tihna chu a dik zia pholanna anga ngaih a ni bawk a. Israel chuan Hamas te nuaichimit tur chuan Rafah khawpuia an awmna chu luhchhuah ngai ngeiah a ngai hmiah thung a ni.
Hamas te chuan Tel Aviv an kah chhan sawiin Israel in ‘civilian te a nghaisak chhanna’ tiin an sawi ve thung a. Hetihlai hian kar thar hi Israel leh Hamas te chuan inkahhai a awm theih nana inbiakna an neih leh hun tur a ni.
Israel chuan kar thum kalta khan Rafah beih chu a tan tawh a, Rafah-ah hian Hamas battallion la awm te an tawmkhawm tiin a sawi. Chumai ni lovin Hasmas tena an rukbo Israel la damte chu an dahkhawm ni ngeiah a ngai bawk.
Israel-in beihna a tan hnuah Rafah tlanchhuahsan Palestinian 800,000 chuang an awm tawh a, May thla khan IDF te chuan Rafah khawchhak lama cheng mi 100,000 vel te chu a beih hmain hmunhima insaseng turin a lo ti tawh bawk.