Israel-in Rafah bei chhunzawm zel

Israeli Prime Minister Benjamin Netanyahu chuan khawvel ram hrang hrang ten Pathianni kaltaa Rafah a beih hnuah demna sawia titawh lo tura an tur chungin Hamas-te laka indona chu a kalpui zui zel tur thu a sawi.
Pathiannia Israel air strike avang khan mi 45 in nunna chanin mi za chuangin hliam an tuar tiin Hamas-run health ministry chuan a tarlang.
Netanyahu chuan civilian ten nunna an chan chu pawi a tih thu sawiin, “Kan thil tum kan tihhlawhtlin vek hma chuan indona tihtawp ka tum lo” tiin a sawi.
Civilian-te him theih nan Israel chuan fimkhurna tinrenga chetlak a mamawh a ti a, Israel Defense Forces (IDF) te chuan civilian-te tihnatloh thieh dan tur ang berin hma an la tiin a sawi bawk.
Thawhlehni khan Algeria rawtna angin Rafah strike chungchangah UN Security Council chuan meeting an nei a.
ThawhTanni khan UN secretary general Antonio Guterres chuan Israe airstrike chuan civilian humhimna zawnga kalkhawm te chu a tihlum a ni tia sawiin, “Gaza-ah hmun him a awm tawh lo, he indona hi a tawp a ngai a ni” tiin a sawi.
Israeli Parliament-a Netanyahu-an thusawina a neih laiin 7 October a Hamas tena an rukbo chhungte chuan an lo au el bawk a. Tun thlenga mitangte chhanchhuah an la ni thei lo chu sorkar an dem a ni.
“Rafah ah mi maktaduai khat chuangte hmunhimah kan chhuah tir tawh a, civilian-te tawrhtirna thlen loh nan theihtawp kan chhuah chungin ruahmanna te a kalsual a ni” tiin Netanyahu chuan a sawi a. “Thil thleng kan zirchiang ang a, chumi hnuah thutlukna kan siam ang a, chu chu kan policy kalpui dan a ni” tiin a sawi.
International organisation te chuan air strike chu na taka sawiselin EU chuan Israel chuan karkaltaa International Court of Justice (ICJ) ruling chu a zah tur a nia, Rafah beih a titawp tur a ni tiin a sawi.
ICJ-in ngenna a siam chungin Israel chuan Rafah run chu chhunzawm zel a tum a. UN human rights chief, Volker Turk chuan Israel in luhlul chhuaha a bei chhunzawm zel chuan indona a kalpuinaah a method thlak danglam tumna a nei lo tiin a sawi.
US chuan Israel-in Rafah a beiha civilian te thihna chu rilru tina tiin a sawi a. Mahse, Israel chuan amah a inven theih nan chetlakna turin rights a nei a ni a ti.
“Israel-in Hamas te a bei hi a rights a ni a, Israeli civilian-te beitu Hamas leader pahnih a tihlum bawk” tiin White House national security spokesperson chuan a sawi.
Hetihlai hian Spain prime minister chuan helai region-a remna leh muanna a awm theih nan Palestinian statehood chu tihmakmawh tiin a sawi a.
Pedro Sanchez chuan palestinian statehood din chu ‘historic justice’ thil a nih bakah remna leh muanna tluantling a awm theih nana tihmakmawh a ni a ti bawk a.
Spain bakah khawvel ram hrang hrang 140 velte chuan Palestinian statehood chu an pawmpui tawh a ti bawk.
Israel Foreign Minister Israel Katz chuan Spanish sorkar a sawiselna hle thung a. Karkalta khan Spain left-wing deputy prime minister leh labour minister ni bawk chuan sel hlawh tak ‘Palestinian te chu luipui aTanga tuipui thlengin chhuah zalenin an awm ang’ tih chu a hmang a.
Hei hi chhang letin Katz chuan Diax ngaihdan chu Hamas leh Iran leader te ngaihdan nena inang chiah a ni tia sawiin ‘State of Israel nuabo leh chumi hnuah Palestinian Islamic terrorist state chu luipui aTanga tuipui thlenga din an tum a ni’ a ti bawk a.
Katz chuan Spanish prime minister pawh ‘jewsish mipuite tihhlum leh war crime an laka kalpui tura fuih’ tiin a puh bawk.
Hetihlai hian China pawhin Israel chu Rafah a beih chhunzawm lo turin a ngen bawk a. Beijing chuan Rafah a Israel military operation neih mekah ngaihThatlohna a nei tiin foreign ministry thupuangtu Mao Ning chuan a sawi.