Ukraine leader Volodymyr Zelensky chuan Khawthlang ram te chu an theihna zawng zawng hmanga Russia chuan inbiakna dawhkan a kil ngei theih nana nawr turin Madrid a tlawhnaah a ngen a. Russian hmalakna zel dan nan military aid billion dollar tel pek a ngen bawk.
NATO chief Jens Stoltenberg pawhin Ukraine allies te chu Kyiv hnena ralthuam an pekah bituk an neihna chu ennawn turin a ngen a, chu tak chu Ukrainian president in a ngen ber a ni bawk.
“Kan thawhpuite nen chak zawka hma kan lak theih dan tur kan ngaihtuah a ngai a ni. Russia hian remna dawhkan a kil ngei theih nan kan nawr tur a ni” tiin Zelensky chuan a sawi a.
Hetihlai hian Russia thung chuan eastern Ukraine-ah khua pahnih a lak leh thu sawiin tun hnaiah hma a sawn hle a. Ukraine chuan France chuan military instructor a tirhluh tur thu a sawi bawk.
Hnungtawlh mek reng Ukraine chuan a bik takin United States chu Russia ram chhunga supply hmun te beihna turin long-range weapon pe turin a ngen a.
Washington leh ram dangte chuan Kyiv hnenah hian ramri piah lam kah phakna tur ralthuam an pe hreh hle a, a chhan ber pawh Russia nena inbakkaihna a thlen an duh loh vang a ni.
“Lungruala thawkin Russia chauh ni lo min thawhpuitute pawh Russia laka kan inven That theih nan kan nawr a ngai a ni” tiin Zelesnky chuan a sawi.
“Kan thawhpuite thurawn min pe ngam Tha lo te pawhin an hriat tur chu air defence hi defence a ni a, attack a ni lo” tia sawi bawkin Ukraine chuan thlatin aerial bomb 3,000 vel lo dang chat thei tur aerial defence system a mamawh a ni a ti.
Khawthlang ramte pawhin an ngaihtuah nawn mai thei dawna ngaih niin Stoltenberg chuan ThawhTanni khan Sofia khawpuia NATO lawmaker te chuan khuahkhirhna an siam chu hlih duhna an awn tiin a sawi a.
“Ukraine in Russia ram chhunga military target te a beih ve theih loh chuan Ukrainian te kuthnung suihsakin an awm tihna a ni a, an tan chuan inven a harsa dawn lutuk” tiin a sawi.
-- Advertisement --
Patriot mamawh
Ukraine chuan US chu a Patriot air defence system chu Russia in a beihna laka a him nan a dil bawk a, Patriot missile tlemte chauh pawh a tawk tiin a sawi.
Zelensky chuan Madrid a thusawina a neihah Patriot system pasarih chauh pawh kan mamawh belh a, Kharkiv ven nan pahnih kan mamawh a, helai hi Russian border hnaih a ni a, kah tawk fo a ni a ti.
Sanchez chuan Spain chuan Kyiv hnenah patriot missile a pek tawh thu sawiin thawhpui ram dangte nen patriot missile engzah nge a mamawh ang tih an ngaihtuah ang tiin a sawi bawk.
Hetihlai hian French military instructor te chuan Ukraine an lut dawn bawk tiin Kyiv army chief Oleksandr Syrsky chuan a sawi bawk a. “French instructor ten kan training centre te an tlawh theihna turin document-ah hming ka ziah hnan tawh” tiin a sawi.
Russia chuan Ukraine chu long-range weapons hmangin a bei char char a, Ukraine chuan Russia ram chhung beihna tur a nei ve si lo va, chu tak chu khawthlang ramte hnenah dilin pek a nih theih nan a kar zui zel a ni.