Israel-in Trump-a’n Gaza kalpui dan tur a ruahman hnawl

Israeli Prime Minister Benjamin Netanyahu-a chuan US President Donald Trump-a’n Gaza kalpui zel dan tur point 15 awmna ruahmanna a siam chu a hnawl a, Hamas-ten ralthuam an dah vek ‘tak tak’ hma chuan a sipaite a hnuk kir dawn lo tih a sawi.
Trump-a Board of Peace chuan thla hmasa khan Hamas leh Gaza-a ralthuam keng pawl dangten ‘ralthuam an dah vekna turin’ inremna an siam tih a lo puang tawh.
Hetih lai hian Hamas chuan Israel-in ‘an nekna chi hrang hrang’ a tawpna tur leh Gaza atanga an sipaite an hnuhkir kalpui atan an ralthuam liante chauh an dah dawn tih an sawi.
October thlaa inkahhai an puan hnuah pawh Israel hian Gaza-ah ni tin deuhthaw beihpui a la thlak tho.
“Israel chuan point 15 awmna thu ziakte kha kan hnawl,” tiin Netanyahu-a chuan Pathiannia cabinet meeting-ah a sawi.
Israeli sipaite hi ‘Hamas-in an ralthuam an tun tak tak lohva kan sipai leh khua leh tuite tana hlauhawma an awm zel chhung chuan an inhnukdawk lo vang’ tih a sawi bawk.
Hamas thuneitu sang pakhat chuan Pathianni vek khan BBC hnenah an pawl chu inremna an siam danah ‘an ding nghet’ a, point 15 awmna ruahmanna ‘a taka kalpuia an tih tur chin ti ve turin’ an inpeih tih a sawi thung.
Palaite chu ‘lehlam lehlamin inremna an zawmna turin’ hma la turin a ti bawk.
Israel-in a rawtna a hnawl hi Trump-a’n nikum September thlaa a puan, Gaza-a muanna a awm theih nana rawtna tan thil pawi tak a ni.
Ruahmannaah hian inremna kalpui dan vil tur Board of Peace siam te, Hamas-in ralthuam an dah te, Israeli sipaite inhnuhdawk leh Gaza tun din te a tel.
Netanyahu-a’n Trump-a ruahmanna a hnawl hian mi a barakhaih lutuk lo va; mahse, a puan nan hun a duh rei hian Israeli hruaitu hi dinhmun khirh takah a ding tih a tilanga ngaih a ni.
Rawtna hi a pawmpui loh rualin a thawhpui tha ber hi tihlawm loh a hlau nia ngaih a ni.
Netanyahu-a hi an ramah nawrtu a nei nasa a, a bikin sorkara a thawhpui far-right an tihte phei chuan Trump-a rawtna hi pawm lo turin an duh a, an zingah hian National Security Minister Itamar Ben Gvir pawh telin, ‘pawm theih loh’ tiin a sawi.
UN chuan Gaza-a cheng zinga 90% vel, mi maktaduai 1.9 chuang chu Gaza-a indo a intan atangin an tlanchhe kual tawh niin a sawi.
Indona hi Hamas-in October 7, 2023-a Israel chhim lam beia mi 1,200 chuan an thah leh hren tura mi 251 an hruai atanga intan a ni a. Israel hian sipai hmanga Gaza bei zuiin mi 73,000 chuang thah an ni tawh niin health ministry chuan a sawi.