Israel-in Yemen khawpuia Houthi hmunte kap

Israel-in Yemen khawpuia Houthi hmunte kap
Israel chuan Nilaini khan Yemeni khawpui, Sanaa leh hmar lama al-Jawf province a kap a, Houthi health ministry chuan mi pakua thiin mi 118-in hliam an tuar niin a sawi.
Tun hi Gaza indona kal mek kaihhnawiha Israel leh Yemen-a Houthi hel inkara inkahna thleng thar ber a ni.
Israeli sipaite chuan sipai camp te, Houthi sipaiten an auhla an vawrh chhuahna department pui ber leh tuialhthei an dah khawlna hmun an kap fuh niin an insawi.
Houthi sipai thupuangtu erawh chuan Israel hian missile kah chhuahna an tum niin a sawi ve thung a. “Civil mi ngei an tum,” tiin a sawi bawk.
Chanchinbu pahnih pawh an bitum thu leh thi leh hliam zingah chanchinbu mi leh an beih bulhnaia kalte an tel thu a sawi bawk.
Sanaa-a cheng pakhat chuan tlang pahnih inkara hmun biru lai, command and control headquarters kah fuh a ni tih Reuters a hrilh a. Thil chhiat dan erawh a hre lo tih a sawi.
Thil thleng hmutute chuan Israeli-te hian Houthi defence ministry pawh an kap fuh niin an sawi.
August 30 khan Israel hian Sanaa kapin Houthi-in an kaihhruai sorkara prime minister leh minister eng emaw zat an thi a, hei hi hela an hotu lian an beihna hmasa ber a ni nghe nghe.
“Beihna hi Houthi leh an kaihhruaiten Israel beia unmanned aerial vehicle leh surface-to-surface missile hmanga Israeli ram chhung an kah fo vang tih a ni,” tiin Israeli sipaite chuan an sawi.
Iran-in a puih Houthi-te hian Red Sea-a sumdawng lawngte beiin Gaza-a Palestinian-te lam an tang a ni tih an lantirna a ni tih an sawi thin.
Israel hi missile-in a kap fo bawk a, a tam zawk erawh a tum a fuh hmaa lo dan thin a ni.