Israel leh Hamas-te inrem thei ang em?

International mediators te chuan Israel leh Hamas tena inkahhaina an neih theih nan hma an la chuhnzawm leh a, mahse, inremna siam theihna a tlem riaua ngaih a ni thung.
August 15 khan inbiakna neih leh niin Israel leh Hamas te chuan khawvel ram hrang hrang tena an thlawpa inkahhai awm theih nana hmalakna chungchangah ngaihdan hrang an nei ve reng bawk.
Hamas te chu an la tangkawh zui tlat a, chutih laiin Israel chuan a thu zuk mai mai a tum bawk si lo. Inkahhai awm theih nana inbiakna chuan awmzia a nei lo tiin Hamas-te chuan tel ve an tum loh thu te an sawi bawk.
Chutih laiin Gaza -a inbeihna chu la kal reng a, regional war chhuakin Iran leh a proxy te hnuh luh zual a ni ang tih hlauhna a lian hle. Tun hnaia Tehran khawpuia Hamas top leader thah a nihna chuan boruak sosang a siam zual a ni.

Cease-fire deal leh harsatna
May 31 khan US President Joe Biden chuan inkhahhaia inremna tluantling leh zalenna awm theih nana ruahmanna a siam chu a tlangzarh a. He ruahmannaah hian US chuan a tum ber chu indona tihtawp a ni.
Rawtna chu thuang thuma kalpui tur a ni a. A hmasa berah chuan kar ruk chhung inkahhai a awm anga chutih chhung chuan Gaza a mipui bitna hmun atangin Israeli sipaite an inhnuhdawk ang a, chumai bakah Palestinian lung in tang hmeichhia, kum upa, hliam tuar thahnem tak chhuah zalen an ni bawk ang a. Palestinian civilians te in leh lo chhuahsana tlanchhe mek te chu an let leh remtih a ni ang a, tanpuina pek zui an ni ang a, tanpuina pek pawh tihpun a ni ang.
Israel leh Hamas te chuan he kar ruk chhung hian inbiakna nei reng bawkin a thawhhnihna kalpuina tur sawi dunna an nei ang. A thawh hnihnaah chuan Biden chuan lung in tangte an vaia chhuah zalen tawn tur a ni ang a, Israel pawh Gaza atangin a inhnukdawk vek ang a, temporary cease-fire chu permanent a ni zui ang.
A thawh thumna chu Gaza dinthar lehna a ni ang a, indona avanga chhiatna nasa tak te chu thuam thata dinthar leh tur a ni ang tih a ni.
Biden chuan a rawtna chu kal tlangpui a tum nasa chungin inremna a thlen phah chuang lo va, Israel leh Hamas te inkar chu a chhe tual tual emaw tih mai tur a ni zawk.
Israel chuan Biden rawtnaah sawisel neiin a tira inkahhai chu a thawh hnihna a thlen hma engtia rei pawh awh se remtihna a thlen thei a ti a. Israel chuan Hamas te chuan inbiakna neihah tul hauh lovin chhuanlam dawrawm te te hmangin inbiakna thawhhnihna thleng thei lovin an pawt khawmuang char char thei a ti.
Hamas-te thung chuan Israeli mitang an kawl te chu chhuah zalen an nih chuan Israel in indona a chhunzawm leh nghal thei an ti ve thung a, chu chu tun hnaia Prime Minister Benjamin Netanyahu thusawi danah a lang reng an ti ve thung. Chu mai bakah Israel te chuan inbiakna neih laiin Hamas-te pawm theih loh tur rawtna siamin chu chu behchhana hmangin Hamas ten an pawm theih loh thu an sawi hnuah beihzui nana behchhanah a hmang thei ang ti bawk/
Israel chuan tun hnaiah inbiakna neihah ‘additional demands’ a siam tiin Egyptian officials te inbiakna kaihhnawih hre vek te chuan an sawi a. Mahse, hei hi Netanyahu office chuan hnawl thungin additional term an tih chu ‘essential clarificationss’ zawk a ni an ti ve thung a. Hamas te pawhin additional demand 29 siamin mahse engte nge tih sawilan a ni lo thung.
Egyptian officials te chuan Israel chuan Gaza in Egypt nena ramri an neih Philadelphia corridor chu thunun a duh a ti bawk a. Israel chuan he corridor hi Hamas tena underground tunnel hmanga ralthuam chawkluh nan bera an hman a ti a, Egypt erawhin a hnawlsak thung.
Israel chuan Gaza tan tlangtu east-west route-ah sipai dah a duh bawk a, chu chu hmar lam atanga militant tena an ram an luh loh nana a tih a ni. Hei hi Netanyahu office chuan an ngiat tlat a ni bawk a, Hamas te chuan hei hi hnawl thungin Israel chuan Palestinian te Gaza a let tur danna remchangah hman a tumna an ti ve thung.
Hei bakah hian Netanyahu chuan Hamas tena Palestinian prisoner Israeli lung ina tang mekte chhuah zalen tura an ngiat thenkhatte chu a remti lo an ti bawk a, Hamas-te chuan chung an mi pawimawhte chhuah zalen an nih loh chuan inremna siam an duh lo ve thung.
Israel chuan Hamas tena a khua leh tui an kawlte chu nung dama la awm zawngte list a dil bawk a, hei hi Hamas te chuan an hnawlsak bawk a.
Netanyahu leh Hamas leader thar Yahya Sinwar te chuan indona chu la kalpui zel thei an ni. Netanyahu sawiseltute chuan indona chu politics thila survive a tumna pawhsei an tihsak a. Chutih laiin Netanyahu coalition sorkara far-right te chuan inkahhai a remti a nih chuan a sorkar chu an paihthlak tur thuin an vau bawk.
Indona kal zelah khawvel ram hrang hrang ten Israel an demna a nasa tial tial a, Hamas ten an hlawkpui thung. Chutih laiin Tehran a Haniyeh thah a nih theihna chuan Hamas leader thar Sinwar pawh indona tawp pawh ni se a nunna chu derthawng takin a awm reng tihna a ni bawk.