Laiu Fachhai
-- Advertisement --
Israel fate chu Pathian hnam thlan an nihzia leh Pathianin Israel ram leh Jerusalem khawpui a lainatzia te Bible, a bik takin Thuthlung Hlui-ah kan hmuh tam avangin (Exod 14.2; Sam 122.6; etc), Israel leh Palestine inkara buaina kal zelah pawh hian khawvel leh Mizoram Kristiante zingah Israel lamtang tam tak an awm a ni. |awngtainaah pawh Israel-in hnehna a neih theihna tur lam a hawi thin awm e. Pathian Thu thuk zawka zir lo leh tunlaia Middle East geopolitics zir chiang lote tan chuan hriatthiampuina tur chin a awm. Chutih laiin chutianga lamtang bik neiha tawngtaina chuan Pathian a tilawm ang em tih hi kum zabi sawmhnih pakhatna Kristiante chuan ngun taka kan ngaihtuah a hun tawh tak zet a ni.
Abrahama, Isaka leh Jacoba te hun lai khan Israel ram tih a la ding rih lo a, Kanan ramah an la awm rih a ni. Aigupta ram atanga an rawn let leh hnu, Roreltute hun (1375 BC) atanga Lalte hun (586 BC) thleng kha Israel ram chu ram zalen a ni a. Kum 930 BC-ah Chhim leh Hmar tiin an inthen a, Hmar lam ram chu Israel tiha koh deuh bik niin, Samaria chu an khawpui atan an hmang a, Chhim lam ram chu Judah tiha koh a ni a, Jerusalem chu an khawpui atan an hmang chhunzawm a ni.
Hmar lam ram chu Asuria-in 722 BC-ah a hneh a, Israel fa tamtak chu Asuria ram lam sala hruai chho an ni a. Asuria chu Babulon-in a hneh ta a, Chhim lam Juda ram pawh chu Babulon-in runin kum 586 BC-ah a la ve ta a ni. Chutichuan Israel fate chu Babulon ram lam sala hruai chho an ni leh ta a. Babylon chu Persia-in a hneh ve leh ta a, Israel ram chu kum 538-323 BC chhung Persia rorelna hnuaiah a awm ta a ni. Persia lal Kuria chuan Israel fate chu an ramah kir leh a phalsak a, chutichuan Zerubabela, Ezra leh Nehemia te kaihruaina hnuaiah Babulon ina a tihchhiat ta Jerusalem khawpui leh Temple te an din thar leh ta a. Hei hi zawlneite ina saltangte an ramah an kir lehna tur thu an lo hrilhlawknate a taka lo thleng a ni (Deut 30.1-6; Isa 41:1-3, 25, 44:28-45:4; Jer 12.11-15; 16.13-15; 24.1-10; 31.16-17; Ezek 11.17; 20.34-42; 34.13; 36.24; 37.21; 39.27-28; Ezra leh Nehemia lehkhabute). An ramah kir leh phalsak an nih chung pawh chuan kir leh lo a, an darhna ramah awm hlen tum Israel fate tamtak an awm bawk. Persia chu Greek-in a hneh ta a, Greek chu Rom-in a hneh leh ta a, Rom sawrkar chuan Jerusalem khawpui leh Temple pahnihna chu kum AD 70-ah a tichhe leh ta a ni.
Kum 586 BC-a Jerusalem lak a nih hnu atang kha chuan, rei lote chhung Makabi (Maccabees) lalte rorel lai (110-63 BC) tih lohah chuan, Israel ram chuan zalenna tak tak a nei tawh ngai lo. Asuria, Babulon, Persia, Greek, Rom, Ottoman leh Britain te awpna hnuaiah awm zelin, Israel rama châmbang Israel fate eng emaw zat awm mahse, tamtak chu ram tinah an awm darh ta a a ni. Khawvel Indopui Pahnihnaah khan German Nazi sawrkar chuan Europe rama Juda mi nuai 60 a that a. Indopui a lo tawp khan Khawthlang lam sawrkarte chuan Juda mite chu an lainat hle a, anmahni hnam bika ram an neih leh theihna tur an ruahmansak a. Chutichuan kum 1947-a neih United Nations (UN) Assembly chuan Resolution 181 a pass a, British awpna hnuaia awm Palestine ram chu, kum 1949-ah ram pahniha thenin, Israel ram leh Palestine ram tiha ram zalen pahnih piantir a tum a. Judate tan chuan thil tha tak a ni laiin, Palestine mite tan erawh chuan UN rawtna chu an pawm thei lo a ni, Palestine khaw tamtak Israel ram chhungah a awm dawn avangin.
UN rawtna anga ram pahniha then hranna tur kum 1949 thlen hmain, Israel chuan May 14, 1948-ah zalenna a puang ta a, indona-in a zui nghal a ni. Israel chuan hnehna changin, Israel chuan a ramri atan a hual chin khuatea awm Palestine mi nuai riat dawn lai chu, West Bank leh Gaza lamah tharum hmangin a hnawt chhuak ta a ni. Khawvel ram hranghranga raltlan Palestine mi tamtak an awm bawk. Kum 1967-ah indona, Six-Day War an tih, a awm leh a, Israel chuan hnehna chang lehin, West Bank, Gaza Strip leh East Jerusalem te chu a awpna hnuaiah dahin tun thleng hian khauh takin a awp zel ta a ni. Israel awpna hnuaia awm West Bank leh Gaza Strip-a Palestine mipuite tan nun a chep hle a, an mihring dikna leh chanvo te thlenga palzutsak an ni zel. Gaza Strip-a awm ho tan bik phei chuan tul bik leh pawimawh bik tih loah chuan zin phalsak an ni lova, mikhualte Gaza-a lut tur pawh dan leh hrai khauh taka kalpui a ni. Chuvangin Gaza chanchin zirmite chuan Gaza chu open air prison (tân in lianpui) a ni e an tih a, Indopui Pahnihna hun laia German Nazi sawrkar ina tihlum tur Juda mite a dahkhawmna Concentration Camp nen khan danglamna awm loh anga sawitute an awm bawk. Israel sipai leh police-te venhimna hnuaiah Palestine ram West Bank-ah pawh dan phal loha in leh lo dintu, settler an tih, Israelte an pung zel a, tunah chuan nuai sarih aia tam Israel Settler-te West Bank-ah an awm tawh a ni.
Palestine ram (West Bank leh Gaza Strip) te chu Israel ina a awp ram (Occupied Territory) an nih avangin, army, air force leh navy te neih phalsak an ni lova, sumdawnna lawng chawlhna (commercial seaport) leh thlawhna tumhmun (airport) takngial pawh neih phalsak an ni lo. Chuvangin zalenna sualtute an chhuak reng thin a ni. October 7-ah Hamas-in Israel chhim lam a run a, Israel mi leh ramdang mi 1200 aia tam a that kha UN Secretary General Pu Antonio Guterres chuan a dem a, a bik takin hmeichhia leh naupangte a that leh zakham nana hostage 200 aia tam an man te a dem rualin, Palestine mite chuan kum 1948 atanga tun thlenga (kum 75 chhung) awpa an awmna leh an mihring dikna leh chanvo te palzutsak an nih zelna te avanga he thil hi lo awm a ni a ti a, khawvelin a hriatpui leh a lainatpui a hun tawh tak zetzia a sawi tel nghe nghe a ni.
Hamas thiltih do letin, Israel sawrkar chuan nuai sawmhnih aia tam Gaza mipuite tan chaw, tui, damdawi, khawlphetha leh fuel (petrol, diesel, etc) a cutsak vek a, ram dang kalna kawng a dan chahsak vek a, nasa takin a bomb a, civil mi inte, damdawi inte, sikul leh refugee campte thlengin Hamas ho awmhmun khuarna tia chhuanlam hmangin a bomb zel a. Gaza hmar lama awm mihring nuai sawm pahnih (Mizoram mihring zat) chu Gaza chhim lamah raltlan turin tawlh chhuahsananna thupek (evacuation order) a chhuah bawk. Media-te report atanga a lan danah chuan, thla hnih vel chhung hian Israel sawrkar chuan Palestine West Bank-ah civil mi 200 aia tam a that tawh a, Gaza-ah 14,000 aia tam a that tawh a ni. Gaza-a thite zingah hian a chanve vel chu pawi khawih lo naupangte an ni. Journalist (chanchinbu mite) 50 aia tam an thi tawh a, UN hnuaia hnathawh 100 aia tam an thi tawh bawk. Hetianga a thiltihte avang hian mithiamte chuan, Hamas ang bawkin, Israel Sawrkar pawh indona dan bawchhetu (war crime tih) niin an puh a, an sawrkar hotute thusawi atanga enin, ethnic cleansing (hnam thian fai) leh genocidal intent (hnam tichimit tumna) neih niin an puh a ni. Hamas kuta awm mek hostage 200+ zinga 50 leh Israel Jailte-a tang mek Palestine mi 8000+ rual zinga 150 chhuahtir nan leh chhawmdawl hna thawk nan inkah hai ni li (24 -27 Nov 2023) puan a ni a, hostage zawng zawng chhuahtir vekna tur indawna pawh a kal mek a ni awm e.
Kum 1948-a Israel ram din a nih khan, Thuthlung Hlui zawlneite ina saltangte an rama kir lehna tura an hrilhlawkna kha a lo thleng a ni lo. Sawi tawh angin, saltangte kir lehna tur hrilhlawkna kha chu Zerubabela, Ezra leh Nehemia te hun laiah khan a thleng tawh. Tunlaia an buaina hi chu tunlai geopolitics buaina a ni a, chuvangin an buaina hi tunlai politics kalphunga sutkian tur a ni zawk a ni. Hmanlaiah chuan ram leh a luahtu inthlak te a awm thin. Hnam hrang hrang ten kum sang liam taa an lo luah thin ram zawng zawng tunlai chhuanah hian an hauh zel a nih chuan, khawvelah hian buaina tawp thei lo a awm dawn a ni. Israel fate chuan kum sang thum ral tawha an lo luah thin ram zawng zawng kha Thuthlung Hlui (Hebrew Bible) tanchhan a, “Kan ram a ni,” tiin an hauh leh vek a nih chuan, Palestine mite chuan ram an nei tawh dawn lo. Chutiang bawkin Palestine miten kum sang dawn lai an lo luah tawhna history tanchhan a, Jordan lui leh tuifinriat inkar ram zawng zawng khu, “Kan ram a ni,” tiin an hauh vek a nih chuan, Israel fate chuan ram an nei tawh dawn lo. Chuvangin ram an nei ve ve theihna turin ruahmanna thar siam a tul ta a ni.
Tawng chi hrang hrang, hnam chi hrang hrang leh sakhua chi hrang hrangte chuan State leh Union Territory hran theuha inrelbawlin India ramah kan awm ho thei ang hian, Palestine mite leh Israel mite pawh an mihring dikna leh chanvo te inang thlapa ram pakhatah an awm ho thei a nih chuan, chu chu duhthsam a ni. Mahse an inkar buaina hi a rei tawh lutuk a, ram pakhata awm ho chu an thlan duh a rinawm tawh lo. Chuvangin kum 1967 hmaa ramri kha zul a, Independent ram ve vea an awm tur chu an buaina sutkian dan tur tha ber ni tawh maiin a lang. 1967 hmaa ramri ang a nih chuan, West Bank, Gaza Strip leh East Jerusalem te khu Palestine ram chhungah awm tur a ni a, Israel chuan West Jerusalem leh tuna a luah chin ram khu a nei hlen dawn a ni. He UN rawtna, two state solution, tih lohah chuan an buaina sutkian dan tur ruahmanna dang a vang tawh hle.
Kristiante tan chuan Lal Isua nun, rawngbawlna leh thusawi te kha kan chunga thuneitu ber a ni tur a ni a. Lal Isua hun laiah khan tuna kan sawi mek ram hi Rom awpna hnuaia awm a ni a, Judai ram tia koh bial awm ve bawk mahse, a ram pumpui chu Palestine ram tia hriat a ni tawh a. Sawi tawh angin, Palestine ramah chuan Israel hnam chambang eng emaw zat awm mahse, Israel fa tam zawk chu ram hrang hrangah an awm darh lai a ni. Isua khan khawvel hmun hrang hranga awm Israelte kha Palestine ramah kir leh a, Israel Lalram tundin lehna tur thu a sawi lo. Israel fate ina an hloh tak zalenna leh Israel Lalram din thar lehna politics pawh a kalpui lo. Isua ina a din tur Lalram chu mihring thinlunga awm Lalram a ni (Jhn 18.36). Hemi vang hian a ni ang; Pathianin Mesia a rawn tir ang a, chu Mesia chuan Rom lak ata zalenna min hmuhpui ang a, Davida Lalram min dinsak leh ang tia beiseitu leh Israel zalenna sualtu Zealot pawl kha Isua chuan a zawm lo a, an hruaitu pawh a ni hek lo.
Tunlai Israel ramah khuan Juda Kristiante tlemte an awm a, Juda hnam tam zawk erawh chu Lal Isua chu Mesia a ni tih pawm lohtu Juda sakhua (Judaism) zuitute an ni. An Prime Minister leh hruaitu dangte khu Lal Isua ringlotute an ni hlawm. Chuvangin Kristiante tan chuan, sakhaw lam thuah chuan Palestine rama Muslimte aia Israel rama Juda sakhua zuitute kan tan zawkna tur a awm lo. Isua Krista chu Mesia a nih tih pawm lohtu an ni ve ve. Kan Lalpa Isua Krista thinlung tawmpuin Palestine mite leh Israel mite chu ang khat veka kan en tur a ni zawk. Lal Isua Lalram ah chuan Israel mite duhsak bik an ni lo a, Israel nih avanga automatic-a vanram kai theih a ni bawk hek lo. Israel mi pawh, Palestine mi pawh, tu pawh, amah Lal Isua kaltlanga Pathian nena inrem vek tur kan ni (Jhn 14.6; 2 Cor 5.16-21; Gal 3.28). Lal Isua ringtute zawk hi “Israel thar” kan nihna lai a awm.
Kum 1948 atanga tun thlenga Palestine-Israel buainaah hian tuar bertute chu Palestine civil mite an ni zel. Kristiante chuan tuar zawktute lamah tang tlat a, an tan nasa takin kan tawngtai zawk tur a ni dawn lo’m ni? Judate zingah kan rinpui Kristian tlemte an awm a, Palestine mite zingah pawh kan rinpui Kristiante an awm ve. AD kum zabi pakhatna atang tawh khan tun thlengin Palestine ramah khuan Palestine Kristiante an awm reng a ni. Israel tan kan tawngtai rualin kan Kristianpui Palestine mite pawh tawngtaisak ve tur a ni dawn lawm ni? Chuvangin Palestine leh Israel inkara buaina khu tha taka sutkian a nih a, remna leh muanna a awm theihna turin, tawngtai thiltihtheihna thuruk ringtu leh tawnhriattu Kristiante chuan rilru thar puin lamtang bik nei lova kan tawngtai a hun tawh takzet a ni. Independent ram ve vea awm tura rawtna (two state solution) pawm duh lo, a ram zawng zawng anmahni ram bik atan neih vek duh extremist pawlte Palestine lam leh Israel lamah an awm ve ve a, chu mite chuan remna ke an pen theihna turin an tan a bik taka tawngtai a pawimawh zual hun a ni.