Israel Supreme Court-in ultra-Orthodox te sipaia tang turin a ti

Israel Supreme Court chuan June 25 khan thutlukna siamin ultra-Orthodox te chu sipaiah an tang ve tawh tur a ni a ti a, court thutlukna hian Prime Minister Benjamin Netanyahu coalition sorkar chu a titlu thei tia sawi a ni.
Court chuan Jewish seminary students leh midang zawng te chu thleihran tur a ni lo a ti a. Israel a compulsory military service system chu khua leh tui dang te ang bawkin ultra-Orthodox ah pawh hman tho tur a ti.
Tun hma atanga inremna anga kalpuiah ultra-Orthodox mipate chu sipai-ah an tan ve kher a ngai lo va, a bak zawng Jewish mipa leh hmeichhiate chu sipaiah an tan vek a ngai a ni. Ultra-Orthodox te hriatthiamna bik hian secular public ah thinrimna nasa tak a siam sa tawh a, a bik takin tun hnaia Gaza indona avanga israel-in sipai tang tura mi sing chuang fe a koh hnuah a nasa zual a ni.
Politics thilah ultra-Orthodox party te hian thil an tithei hle a, tunah pawh Netanyahu coalition sorkarah pawimawh tak niin court thutlukna siam chu an duh loh thu an sawi nghal a. Ultra-Orthodox te laka hriatthiamna kalpui a nih loh chuan lungawilohna lantirin Netanyahu sorkar chu tlu mai thei a ni dawn a ni.
Court-a inkhinna neihnaah pawh sorkar lawyer te chuan court hnenah ultra-Orthodox mipate sipaia tantir an nih ve chuan ‘Israel society a tipherh vek thei’ tihialin an tang a ni.
Court thutlukna siam lai mek hian Gaza a indona chuan thla kua hmel a hmu tawh a, sipai nunna chan an pung tial tial bawk a.
Court chuan sorkar chuan ‘selective enforcement dik lo kalpuiin chu chu rule of law bawhchhiatna leh dan hmaah mi tin kan intluk tlang vek tih principle kalh a ni’ tiin a sawi a. Ultra-Orthodox te chu sipaiah tantir ve tur tih erawhin a sawi fak lo thung.
Court chuan ultra-Orthodox mipate zirna seminary a sorkar sum hmanga puihna pek te pawh tihtawp rih tur a ti bawk a. Kumin kumtir pawh khan court chuan seminary budget chu khawihchet theihlohin a lo siam tawh bawk.
Israel Cabinet Minister Yitzhak Goldknopf, ultra-Orthodox party chuan social media X a post a siamh court thuremna chu ‘vanduaithlak leh pawi tak a ni’ tiin a sawi a. Mahse, an party in sorkar an chhuahsan dawn leh dawn loh tur erawh sawi lanna a nei lo.
“State of Israel hi Jewish mipuite tana din a ni a, chung mite tan chuan Torah chu a bulthut a ni. Holy Torah a chungnung ber zel ang” tiin a ziak a ni.
Ultra-Orthodox te chuan full-time religious study an neih chu state of Israel humhim a nih theih nana hmalakna pakhat angah an ngai a. Mi tam tak te chuan military kaltlanga secular society nena inthlunzawm nasat chuan an rinna khauh taka an kalpuina a tidal thei dawnah an ngai a ni.
Ultra-Orthodox mipate chuan sakhuana lam zir burin, secular topic dang math, English emaw science emaw an zir mang lo va. Sipaia tang tur emaw secular workforce ni turin inzirna an nei lo an ti.
Religious women te chu hriatthiamsa nghal mai leh inhnialna pawh awm mang lo a ni a, a chhan ber pawh Israel chuan hmeichiate chu combat unit a tel tak tak turin a ngai lo a ni.
Court thutlukna avang hian Israel coaltion sorkar ah ultra-Orthodox thlawp zawnga kal zel leh chu ngaihdan duhlotute inkarah khi chat nasa zawk a siam dawna ngaih a ni a. Ultra-Orthodox lawmakers te chuan religious leader te atangin nawrna nasa tak an tawk ngei dawn bawk.
Ultra-Orthodox te sipaia tantir ve chungchang hi hun rei tak dan hmanga inbeihna awm tawh niin court chuan hriatthiam bik an nihna chu a pawm lo a ni. Israeli leader te pawhin ultra-Orthodox party te an tihlawmloh an hlauh avangin an kalpui ngam ngai lo va. Tunah Netanyahu sorkarin court thu a zawm ngam dawn em tih chu la inlailang tur a ni.
Netanyahu coalition sorkar-ah ultra-Orthodox party pahnih awmin chung mite tel lo chuan a sorkar chu a tla dawn a, Knesset a member 120 awmnaah lawmaker 64 neiin majority a nei tawk tawk mek chauh a ni.
Israeli zingah pawh ultra-Orthodox te chu midang zawng aia inthlahpung chak niin kum tin birth rate 4% nei ang an ni a. Kum tinin ultra-Orthodox mipa 13,000 velin kum 18 an tling ziah anga ngaih a ni bawk.