Israeli-ten mi hren chhuahna tura inremna siam turin PM nawr
Israeli-ten mi hren chhuahna tura
inremna siam turin PM nawr
Israel-a mi 15,000 chuang pungkhawm chuan Gaza-a indona kalpui mek titawp tur leh Prime Minister Benjamin Netanyahu-a chu mi hren mekte chhuah tura inremna siam turin an nawr.
Hamas-in an la hren mek chhungte leh anmahni thlawptute chu Jerusalem-a Paris Square leh Tel Aviv-ah an pung khawm.
Gaza-ah hian mi 48 la hren mek niin mi 20 hi la dam nia hriat an ni.
Israel hi thenkhat chhuah phawtna tura rawtna a pawm duh lo va, a ruala an vaiin an chhuah theih a phut.
Netanyahu-a chuan Hamas an hneh chuan mi hrente an hruai haw mai dawn a ni tih a sawi.
Hamas hian October 7, 2023 khan Israel chhim lam beiin Gaza-a hren turin mi 251 an hruai a, mi 1,200 vel an that bawk.
Israel hian phuba lain Hamas chhut chimih tumin a bei nghal a, Palestinian 64,368 vel thi an awm tawh nia hriat a ni.
Israeli-te leh an thawhpui ram dangten Istael hi sipai chakna hmanga Gaza an bei mek titawp turin an nawrna sawt hle.
Hetih lai hian Israel Defense Forces (IDF) chu indo turin an inbuatsaih zel zawk a, Netanyahu-a sorkar chuan Gaza Strip chu a vaia thununa Hamas nuai chimih a tum.
Inrinni zana Tel Aviv leh Jerusalem khawpuia mipui pungkhawm hi tun hnaia mi hren chhuah phutna leh indo titawp tura nawrna lian ber a tling.
Netanyahu-a chenna in atanga hriat phak leka thu sawitute chuan kum hnih dawn kal ta atanga Hamas-in an hrente chhuah tura inremna siampui tura an duh thu an sawi hlawm.
Pungkhawmte hian indona kal zel chu Hamas-in an la kawl mekte nun tiderthawngtu a nih thu ans awi.
Netanyahu-a hian indo tihtawp a la tum mai lo niin a lang zel a, a sipai hotu lawk ni thinte pawhin IDF hian mi hrente nunna tiderthawng si lova Gaza-a a tam thei ang ber hnehna chan an tum nia an ngaih thu an sawi hlawm.
An ram chhung bakah Israel hi an thawhpui ram dangte pawhin Gaza-a indo titawpa a rang thei ang bera mi hrente an hawna tura inremna siam turin an nawr.
“Gaza-a mihring nun khirh lutuk hi kan ngaimawh a, hei vang hian Israel pawh sipai chaknaa a beihna titawp turin kan nawr fo a ni,” tiin Pathiannia Jerusalem tlawhtu, Denmark Foreign Minister Lars Rasmussen-a chuan a sawi.