Italian Open semi khel tur a chiang tawh

French Open inbuatsaihnain a vawrtawp a hnai chho zel a, clay season-a tournament lian khelh mek Italian Open mipa singles semi-final match hnih chu vawiin hian khelh zawh tur niin, Daniil Medvedev leh Stefanos Tsitsipas an intum ang a, last four inkhel dangah Norway mi Casper Ruud leh rising star Holger Rune of Denmark an insu thung ang.
Italian Open quarter-final match pakhatah Russian Med-vedev hian 6-2 6-2-a Germany player Yannick Hanfmann sawp chungin season kal laia a vawi sarihna atan semi-final a lut.
Kum 27 mi Medvedev hian tunhma lamin Rome khaw tournament-ah hian hnehna a la chang ngai lo a, mahse, kumin zet erawh a dan a dang ta zak a, tournament chhungin world number three hian set khat chiah a la hloh.
2021 US Open champion Medvedev hian player tha Alexander Zverev a paltlang hnuah German dang qualifier Hanfmann chu ATP Masters 1000 quarter-final a khelh vawikhatnaah a hneh leh a ni.
Vawiin semi-final pakhat zawka a tum tur Tsitsipas hi a la kal tluang zawk a, last four a luhna kawngah set khat mah a la hloh lo.
Greek world number five Tsitsipas hian last eight inkhel dangah Borna Coric tumin, Croatian zawk hian chawlhkar hnih chhunga semi-final vawihnih luh a tumna a paltlang zo lo.
Kum 24 mi Tsitsipas hi nikum Rome final-ah khan Novak Djokovic hneh loin a tlawm a, a round hmasa lamah tualchhung tlangval ve ve Lorenzo Musetti leh Lorenzo Sonego hnawt-chhuak tawh mah se quarter-final match-a Coric a tum tumin Italian fans tan a hlawh zawk a, 6-3 6-4 hnehna nen last eight a lut.
Champion tura rinkai pahnih dang Djokovic leh world number two Carlos Alcaraz an tla fel tawh a, Medvedev leh Tsitsipas-te hi clay-court title hawn tura rinkai an nih chhoh laiin semi-final-ah a tu emaw zawk zawk an tlak a ngai dawn a, French Open khelh chhoh tur atan pawh beiseiawm an ni zui zel ang.
Tun hi kum 2004 hnu lam Italian Open final-a Djokovic emaw Rafael Nadal emaw hmuh tur an awm loh vawi-khatna tur a ni.
He thu buatsaih lai hian hmeichhe singles final khel tur a la chiang lo a, nizan semi-final pakhat zawkah Veronika Kudermetova leh Anhelina Kalinina intumin, last four inkhel dangah Elena Rybakina leh Jelena Ostapenko an in-hmachhawn ve thung.