Italy-ah ran vulhin naupang thlak ti

Italy-a chhungkaw din chu thil hautak taka ngaih ni tawhin, mihausate chauhin an tih theih ang hiala ngaih a ni tawh tiin Pope Francis chuan a sawi.
Italy demographic crisis chungchanga conference neiha thusawina neihah chhungkaw tam takah ran khawi (pets) te chuan naupang an thlak tawh tiin a sawi.
Chutih laiin thalai tam takte chuan t-shirt ‘we can do this’ tih chu hain midangte chu fa tam zawk nei turin an ngen bawk a.
Italy hi EU-ah pawh fertility rate hniam berna pawl niin nikum khan naupiang 400,000 hnuai lam chauh a nei pha a.
Rome-a thusawina a neihah Pope chuan nausen piang tlahniam zel chuan hma lam huna beiseina a tichau tia sawiin thalai zawkte chu thil chiang lo lutuk, kehdarh leh derthawng lutuka ngaihnain a hneh tiin a sawi a.
“Hna nglenghet tha hmuh harsa te, in luah man sang uchuak te, hlawh hniam bawk si te chu harsatna thlentu lian ber a ni,” tiin a sawi a.
Chenna in thenkhatah chuan naupangte chu ran vulhin an luahlan tia sawiin Pope chuan hmeichhe pakhatin a bag ah hawngin ‘a fa malsawm’ tura a ngen tawh thu a sawi a. Chuta a fa a tih chu mihring ni lovin uite a ni tiin a sawi bawk a.
“Ka dawhtheihna ka hloh hial a,” tia sawiin, “Naupang riltam tam tak an awm laiin i ui i rawn keng a nia ka ti hial a ni,” tiin a sawi bawk.
Naupiang an tlahniam zel a, a bik takin Japan, South Korea, Puerto Rico leh Portugal-ah te an tlahniam zual a.
Italy-ah chuan population tlahniam zel chu manganna tham ni tawhin eurozone-a ram lian ber ni mek an ni a. Mahse, kum 2050-ah chuan a khua leh tui hmun ngaa thena hmun khat a hloh tawh dawna ngaih a ni a. Chutih laiin kum upa an pung tual tual a, tun hnai kum 20 chhungin kum za hawlh a let thumin an pung bawk.
Italy chu ‘country of empty cribs’ tia sawi thin niin Elon Musk meuh pawhin thla kalta khan, “Italy a bo mek,” tiin a sawi bawk.
Mithiamte chuan population crisis chuan retheihna a thlen dawn an ti a. Economy Minister Giancarlo Giorgetti chuan kum 2042 ah chuan Italy a naupiang tlahiam zel avangin a gross domestic product (GDP) chu 18% in a tlahniam tawh ang a ti.
Italy-in nausen a neih tlem chhan tam tak a awm a. |halai ten hna an van a, childcare support system a tha tawk lo va, chuvangin nu tan hnathawh pah leh chhungkaw enkawl a tiharsa zual a ni.
Save the Children charity te chuan Italy-a nu 10 zela paruk te chuan nursery access an nei thei lo an ti a. Naupai tam tak chu an hna atanga ban luihtirin an awm a, nau an paiin an hna atangin banin an awm mai thin a ni.
Italy naupiang tlahniam lutuk chu ‘national emergency a ni’ tiin Prime Minister Giorgio Meloni chuan a sawi bawk a. “Harsatna chinfel chu kan ngaih pawimawh ber a ni a. Italy-in hma lam hun eng nei se kan duh a ni,” tiin a sawi.
Meloni hi nikum September inthlanah khan hmeichhe vote hmu hnem ber niin mahse feminist a inti lo va, Nu leh chuhngkua chu a policy kalpuia a laimuah a dah a.
Naupiang tlem zel harsatna chinfel nan adhoc ministry hial dinin a sorkar chuan fa nei tharte chu income tax pe lova awltir a tum bawk a.
Pope Francis chuan politicians te chu Italy dinhmun a chhiat zel loh nana chhanna nei turin a ngen bawk a. A thusawi zawhah naupai tam tak te chu stage ah lawnin Pope Francis hian mal a sawm a ni.