Karnataka voters te chuan rorel lai Bharatiya Janata Party chu hnawlin Congress chu hneh taka thlang tlingin Legislative Assembly member 224 awmnaah seat 135 lawih an pe a.
Congress tana chinfel ngai hmasa ber zawk chu tu nge Chief Minister atan an ruat ang tih chu niin Leader of Opposition leh Chief Minister hlui Siddaramaiah leh Karnataka Pradesh Congress Committee president D.K. Shivakumar te chuan fiamthu titak deuhin inthlan hma pawhin CM nih an tum thu an sawi ve ve a ni.
Chutih laiin BJP te ‘double engine’ sorkarin hlawkna a ken aupui leh Prime Minister Narendra Modi hova communal then hran lam hawi zawnga na taka campaign kalpuite chu hnawlin an awm a, BJP senior minister rualte chu Congress ten vawthlain tihian Karnataka-ah term hnih a zawna chelh thei an awm zui lo zel bawk.
A bik takin Bengaluru a Jayanagar seat a chak zawk puan mai theihin a awm lo va, vote chhiara hun rei tak hman a nih hnuah BJP candidate C.K. Ramamurthy chuan Congress MLA Sowmya Reddy chu vote 16-in a hneh a ni.
-- Advertisement --
Chhim lam kulh nghet
Karnataka hi BJP tena South Indian state zinga inbun ngnehna an neihna awm chhun niin Hindi heartland piaha ngelnghet zawka inbun an tumna chu a phet nasa hlea ngaih a ni.
Kum 2018 inthlanah khan BJP te chuan seat 104 an la a, tun inthlanah seat 66 chauh an la thung a. H.D. Kumaraswamy kaihhruai Janata Dal (Secular) te tun inthlana nasa taka insiam that tuma beite chuan kum 2018-a seat 37 an lak laiin tun tumah seat 19 chauh an la bawk a. Tun hma atanga JD(S) chakna nia ngaih thin Old Mysore region-ah an chan nasa em a ni.
Kum 2018 khan BJP ten seat 104 an la a, mahse, majority an pha chuang lo va. Coalition sorkar H.D. Kumaraswamy kaihhruai a ding a mahse tluchhe lehin chumi hnuah kum 2019 khan BJP te chuan sorkarna siamin Congress MLA 14 leh JD(S) MLA pathum ten BJP an zawm vanga sorkar siam thei an ni.
Rampum huapin
Karnataka-a BJP te laka chakna an chan hian Congress te chuan Assembly election neih mai tur Madhya Pradesh, Rajasthan leh Chhattisgarh-ah te a tiphur hle tura ngaih niin heng state te hi Hindi heartland tia sawi te an ni. BJP te, state leader te hnawla Prime Minster Narendra Modi charisma hmatheha innghatte chuan campaign strategy dang an ngaihtuah a ngaih phah tura ngaih a ni bawk.
Karnataka inthlan result hian United Progressive Alliance (UPA) chu a la hlui lo tih a pholang anga ngaih a ni bawk a. Tun inthlana chakna chan hian Congress party te mai bakah an president hlui Rahul Gandhi chu Opposition politics-ah a lailum a luahtir phah dawn bawka ngaih a ni.
Karnataka-a chakna chan hian engtiangin nge Congress a tihchak dawn la hmuh chauh tur niin State dangah BJP te elpui ber an nih lohna hmunah danglamna a siam ang em tih te chu hunin a hril tur a ni a. Kum 2024 Lok Sabha inthlan atan regional party dangte nen inzawmna tha zawk a siam ang em tih te pawh hunin a hril tur a ni.
Ngelnghehna
Congress te tana chona nasa ber tur chu State a ngelnghehna siam niin tun hnaiah Karnataka chuan kum nga chhungin Chief Minister pathum a nei hman a ni. Congress-te hian election manifesto-ah ‘guarantees’ panga siamin lower income community te nasa zawka ngaihsak chu thupuiah neih an tum a ni tel.
Vote share lamah Congress te vote share chu kum 2018 a 38.04% atangin 42.91% ah a chho va. BJP te vote share chu 36.22% atangin 35.97% ah a tlahniam thung a. JD(S) vote share chu kum 2018 a 18.3% atangin 13.3% ah a tlahniam bawk.
Chak leh chak lo
Karnataka inthlana chak langsar zingah Chief Minister Basavaraj Bommai, Shiggaon; former CM Siddaramaiah, KPCC president D.K. Shivakumar; H.D. Kumaraswamy, Channapatna; B.Y. Vijayendra, Shikaripura; R.V. Deshpande leh G. Parameshwara te an tel a.
Chak lo langsar zingah Chief Minister hlui Jagadish Shettar (Congress), Legislative Assembly Speaker Vishweshwar Hegde Kageri leh a hmaa Bommai government a minister 12 te Govind Karjol, B. Sriramulu, V. Somanna, J.C. Madhuswamy, Murgesh Nirani, B.C. Patil, K. Sudhakar, MTB Nagaraj, Narayana Gowda, B.C. Nagesh, Halappa Achar, leh Shankar Patil Munekoppa te pawh an tel.