Jack Harlow ‘Lovin on Me’ a Hot ber

Jack Harlow hla hit ‘Lovin on Me’ chu Billboard Hot 100 (singles) chart-ah No.1 niin, Mariah Carey, Brenda Lee leh Tyla te pawh chart top 10-ah an lang. Billboard Hot 100 hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Jack Harlow ‘Lovin on Me’ hian kar khat chhungin stream maktaduai 23.6 leh sales 11,000 neiin, radio airplay-ah pawh ngaithlatu maktaduai 20.8 a nei thei a, hei hi chart-ah No.2 atangin No.1 a kai pui ta, he chart-a a hla No.1 kai thei pathumna a ni. He rapper hian a hla dang ‘First Class’ chu April-May 2022 khan kar thum chhung a lo No.1 pui tawh bakah Lil Nas X nena an thawh dunna ;Industry Baby’ chu October 2021 khan kar khat a No.1 pui tawh bawk. Tihian Harlow hi tun kum thum chhunga kum tin chart-a No.1 kai thei hla la nei ziah pathumna a ni a, Drake leh Taylor Swift te hnung a zui ve ta a ni.
Chart No.1 hlui Taylor Swift ‘Cruel Summer’ chu No.1 atangin No.2-ah a tawlh a, chart No.1 hlui Doja Cat ‘Paint the Town Red’ chu No.3-ah bawk a la awm.
Mariah Carey Krismas hla chuai thei lo ‘All I Want for Christmas Is You’ chuan stream maktaduai 22 leh sales 3,000 a neih bakah radio airplay-ah ngaithlatu maktaduai 15.6 nei thei, No.17 atangin No.4-ah a invawrh kai leh ta a, he hla hi December thla laihawl vel atang chuan chart-ah a No.1 leh thei tawhin a rinawm.
‘All I Want for Christmas Is You’ hla hi 1994-a a tlangzarh daih tawh kha a ni a, December 2017-ah a vawi khat nan chart top 10 kaiin, December 2019-ah No.1 a kai a, chuta tang chuan kumtin Krismas vuakvetah a No.1 ta ziah a ni.
SZA ‘Snooze’ chu No.4 atangin No.5-ah a tawlh a, Zach Bryan featuring Kacey Musgraves ‘I Remember Everything’ chu No.6-ah bawk a la awm a, Tate McRae ‘Greedy’ chu No.8 atangin No.7-ah a insawn ve ta bawk.
Brenda Lee Krismas hla hlui “Rockin’ Around the Christmas Tree’ chu stream maktaduai 22, radio airplay maktaduai 15.4 leh sales 2,000 tlingin No.8 a rawn kai thar leh ta. He hla pawh hi 1958-a tlangzarh daih tawh kha a ni a, 1960-ah chart No.14 a kai a, chumi hnuah a reh ta vang vang a, December 2019-ah chart No.2 rawn kaiin, heta tang hian kumtin Krismas vuakvekah chart top 10-ah a lang ta ziah a ni.
Chart No.1 hlui Taylor Swift ‘Is It Over Now? (Taylor’s Version) [From the Vault]’ chu No.5 atangin No.9-ah a tawlh ve thung.
Chart top 10 khartu chu Tyla hla ‘Water’ niin, radio airplay maktaduai 38.4, stream maktaduai 14.4 leh sales 2,000 tlingin No.15 atangin No.10-ah a invawrh a, he chart-a Tyla hla top 10 a lang thei hmasa ber a ni.