Jairam Ramesh-a’n PM Modi zawhna pe

Prime Minister Narendra Modi-an Bihar a tlawh mek laiin Congress te chuan June 19 khan a tiam angin eng vangin nge Bihar hnenah special category status pek a nih loh tiin zawhna an siam.
Opposition party chuan eng vangin nge Patna University pawh central university status pek a nih loh an ti bawk.
“Pradhan Mantri in Bihar tlawha Nalanda University hawnna a neih laiin campaign laia zawhna thenkhatah chhanna kan ngiat a ni. PM thutiam angin eng vangin nge Bihar hnenah Special Category Status pek a nih loh?” tiin Congress general secretary Jairam Ramesh chuan a sawi.
“Kum 2014 khan a campaign laiin Modi hian chiang takin Bihar hnenah special category status pek a tiam a ni. Centre kalpui ngeia Multidimensional Poverty Index (MPI) Report ah pawh Bihar chu India rama State rethei ber a ni a, State mipui 52% te chuan hriselna, zirna leh living standard tha an nei lo tih a ni” tiin a sawi bawk a.
Kum 2013 khan Raghuram Rajan Committee chuan fund pek danah methodology thar man nise tia rawtna siamin multi-dimentional index hmangin State economic backwardness chu teh nana hman tur an ti a ni, tiin Ramesh chuan a sawi bawk a. Kum sawm ral hnuah pawh sorkarin eng nge a la nghah reng, tiin zawhna a siam bawk.
“Prime Minister hian Bihar mipuite a theihnghilh ta em ni? Centre-ah kum 10 chhung thuenihna a chang a, Bihar-ah kum 20 dawn thuneihna an lek tawh hnuah pawh sorkar chuan State hnenah Special Category Status a pe thei nang e?” tiin zawhna a siam bawk a.
Ramesh chuan Patna University pawh central unversity status an pe duh lo a ti bawk a.
“Kum 2017 khan Modi hian Nitish Kumar an Patna University chu Central University status pe tura a ngenna chu a hnawl fithla thak a ni. Hei hi Bihar mipui tena an ngiat tlat a ni a, a chhan chu zirlai rethei tak tak tak ten quality higher education kalpui turin State an chhuahsan a ngai zel a ni,” tiin Congress leader chuan a sawi bawk a.
“Chhungkaw rethei tam takin state pawna zirchhuah an thei lo va. CPatna University Central university a hlankai chuan zirlai sang tam tak te nun a thlak danglam dawn a ni. Eng vangin nge Prime Minister hian Bihar thalaite ngenna hi a ngaihsak duh der loh le” tiin Ramesh chuan a sawi bawk.
NEET-UG 2024 paper chu a putru em tiin zawhna a siam bawk a. “Ram pum huapa NEET-UG 2024 exam chu thil fello tam takin a tuam mek a, zirlai leh an chhungte pawhin lungawilohna an lantir nasa ta, Prime Minister in ngawih a chuh tlat thung. Issue tam tak zingah paper putru a awm em tih chu chhuichian zinga tel a ni” tiin Ramesh chuan a sawi bawk a.
PM hian paper putru nia sawi chu a pawm nge pawm lo tak sawi se la, zirlaite hnenah siamthat a ni ang tiin tiam tal se la tiin a sawi bawk.
Ramesh chuan Bihta airport chu siam a ni tak tak dawn em a ti bawk a. “Kum 2016 a pawm fel a nih atangin kum riat a ni ta, Bihta airport Patna atanga 30 km leka hlaa siam tumna chu a reh hmak a, siam a ni tak tak dawn em. Gujarat leh Uttar Pradesh te chuan UDAN scheme hnuaiah airport an nei teuh teuh tawh a, eng vangin nge Bihar hnuchhawn a nih bik?” tiin zawhna a siam bawk a. Airport siama Phase I construction chu October 2017 a bultan tura tih leh kum hniha zawhfel tura ruahman a ni a. A hnuah a timeline thlak danglamin kum 2018 a bultana kum 2021 a zawhfel tur an ti leh a ni, tiin Ramesh chuan a sawi bawk.
“State sorkar-in Centre hnenah airport siam nan ram kum 2018-ah a pe tawh a, tun thlengin boundary wall chauh la siam a ni. Eng vangin nge UDAN scheme hnuaiah Bihar hnuchhawn a nih PM hian sawi rawh se, Bihta airport hi siam a ni dawn em?” tiin Ramesh chuan a sawi bawk.