Raltlan thawnkir thu ah ZPM sawrkar ngawi tlat – MNF

Bangladesh atanga Zohnahthlakten raltlan, Mizorama rawn lut tawhte chu BSF-in an thawnkir a, an khuaa an let ngam tawh loh avangin ramhnuaiah an tangkhang tih MNF party chuan a sawi. Hemi chungchangah hian ZPM sawrkar a ngawi tlat tih a sawi a ni.
MNF Gen. Hqrs. thuchhuak chuan, Bangladesh-a Zohnahthlakten buaina nasa tak an tawh vanga Mizorama raltlana rawn lut nunau leh kum upa lam 200 chuang, Mizoram an rawn luh tawh hnua BSF-in an thawnlet chu pawi a tih thu a sawi a. Bangladesh-a an khuaa let ngam tawh loin ramhnuaiah an tangkhang mek tih a sawi.
‘Hetianga kan unauten harsatna an tawh laia Mizoram sawrkar a ngawi tlat hi MNF chuan pawi a ti a. An nunna atana himna zawnga rawn luh tum kan unaute hi ngaihtuah hram turin sawrkar kan ngen a. Zohnahthlak ram hrang hrang amite tan inpui kan nih chhunzawm theih nan sawrkarin ngaihtuahna hmang se kan duh hle,’ a ti.
MNF sawrkar laiin Bangladesh Zohnahthak harsatna tawkte hian Mizoram an rawn pan a, BSF-in lo dangin harsatna an lo siam a. Khatihlaia CM Pu Zoramthanga chuan BSF chu an Bengali pui Bangladesh atanga India-a rawn lut tur an dan loh lai a, Zohnahthlakte dan bik an remti lo, tiin tan a khawh a, thahnem tak an rawn raltlan a, chhawmdawlna pawh pek an ni tih thuchhuah chuan a sawi.
‘Tun sawrkarah kan unauten harsatna an tawk a, sawrkar a ngawi tlat hi hriattiam har kan ti a. Zohnathlakte tuamhlawm a, kuahkhawmtu an ni thei ngang lo a nih pawhin, a lengdarhtu ni lo turin ZPM sawrkar hi kan ngen a ni,’ a ti.