Jamil era chu hnehnain a in\an!

Jamil era chu hnehnain a intan!
Foreign coach hnuaia India men’s football team-in hniam lam an pan zel avangin AIFF chuan tualchhung coach ngei ruaiin, head coach thar Khalid Jamil-a hnuaiah India chuan a vawi khatna atan karliamta Inrinni khan inelna a hmachhawn tan a; Fifa ranking-a an aia sang leh tournament thlengtu pakhat zawk ni bawk Tajikistan lakah 2-1 hnehna changin CAFA Nations Cup football tournament-ah hnehnain bul an tan.
Hisor, Tajikistan-a inkhelah Blue Tigers hian huaisen takin attack an bei a, an tlarhnung ven danin mit a tlung bawk a, Jamil-a signature chuan awmzia a nei dawn e!
World No. 133 India goal hnih hi defender ve ve tihluh niin, tan atanga minute ngana lekah Anwar Ali chuan hmahruaina khungin, minutew 13-na lekah Sandesh Jhingan chuan si hnih faia Indian team hmahruaina goal a thawh ve leh a; Fifa ranking-a 106-na luahtu mualneitu team hian minute 23-naah Shahrom Samiev-a goal hmangin an siphurh pakhat zawk sut then bawk mah se hei bak goal dang Tajiks lam hian an thun belh zo lo a, Khalid Jamil era chu hnehnain a intan ta!
Coach bang ta Manolo Marquez-a hun laia inhliam goalkeeper Gurpreet Singh Sandhu kha Jamil-a hunah kirlehin, captain banhren nen bawk starting XI a rawn luahkir leh thei a, CAFA Nations Cup bul an tanna inkhelah pawh India chakna tura player pawimawh a rawn ni leh nghal.
Khalid Jamil hian inkhelh bana interview tawi a hmachhawnah, “Heti ang result hi hun rei tak Indian fans-in an lo nghah tawh a ni. Hun tam tak goal venhim lam kan buaipui ngei mai a, mahse, he hnehna chang tur hian kawng tinrenga kan beih a ngai a; kan sut leh tur Iran lakah phei chuan tuna aia rilru paukhauh zawk kan mamawh ang,” a ti.
Tarlan tawh angin, India team-ah hian Mizo player pahnih Lallianzuala Chhangte leh Hmingthansanga Ralte an tel.