Japan-a Mizo thalai tam zawk hnathawh theih dan tur dappui
Japan-a Mizo thalai tam zawk
hnathawh theih dan tur dappui
Japan-a Mizoram thalaiten hna an thawh theih dan tur dapin Labour, Employment, Skill Development & Entrepreneurship minister Lalnghinglova Hmar chuan Nilaini khan New Delhi-a Mizoram House-ah Japan Embassy hotute a kawm.
Japan Embassy-a first secretary pahnih – Hagiwara Ryusuke leh Tsubakimoto Mayumi te nen an inkawmnaah LESDE minister chuan Mizoram chu state lian lo, workforce pawh tam lo ni mah se, thalaiten thil an thiam chak a, a bikin kum upa tamna ram Japan-in a mamawh heng – nursing, caregiving leh hospitality sector-ah Mizo thalai theihna a sang tih a sawi.
“Japan-in demand a nei a, keini’n supply kan nei thung. Tunhnaiah LESDE department hmalakna in Mizo thalai engemawzatin Japan-ah hna an thawk tawh a, hei aia liana kalpui kan duh,” tiin, Japan Embassy chu thawhpuiah a sawm.
Mizo thalaiten Japanese culture an ngaihven tih Lalnghinglova Hmar hian sawiin, “Mizorama huaihawt cosplay-ah pawh kan thalaiten Japanese culture pholan an uar hle. Hei hi intihhlimnaa tawp mai loin eizawnna tling, Mizoram leh Japan thlunzawmna hmanrua pakhat ni thei se kan duh a ni,” a ti. Hemi chungchangah Japanese organization-te nen thawhho a duh tih Embassy official-te hi a hrilh.
Sports minister ni bawk Lalnghinglova Hmar chuan Mizoram-in Olympic 2036 vision a nei a, Olympic sports discipline thlanchhuahah JICA atangin Mizoramin sports coach a dil mek tih sawiin, a tul anga bawhzuisak turin a sawm a ni.
Japan Embassy official-te chuan Mizoram leh Mizo thalaite chanchin chu ngaihnawm leh phurawm an tih thu an sawi a. India state dangte nen khaikhinin Mizoram atanga Japan rama hnathawk an la tam lo hle a, Mizo thalaite tana sawrkar hmathlir tihlawhtling turin thawhpui an inhuam reng a, a bikin caregiving leh nursing sector-ah Mizo thalaite theihna an hre tawh tih Mizoram minister hi an hrilh.
Infiamna leh cultural exchange hmanga Mizoram leh Japan thlunzawmna nghet zawk zawn tha an ti a, India ram chhung leh pawna Japanese organization-te nena thawhho kawngah pawh theihtawp an chhuahpui tur thu an sawi bawk.