Ruihhlo-ah raltlan hre lo

Tunlaiin Mizoramah ruihhlo a hluar a, ruihhlo leh a neitu/kawltu pawh police te’n an man malh malh a ni ber. Ruihhlo vanga an mi manah raltlan an awm an hriat loh thu police-te chuan an sawi. Raltlante’n Mizoramah ruihhlo an tawlh avangin ruihhlo a hluar tih ngaihdan a awm a, police lam thlirnaah chuan hei hi a dik lo. Police-te chuan hei hi rinthu, darh ta hluai a nih a rinawm thu an sawi.
CID-Crime Branch te’n an chhinchhiah danin, 2023-a police te’n ruihhlo vanga an mi manteah mi 330 chu India mi an ni a, mi dang 55 chu Myanmar mi an ni. 2024-a an mi manah mi 407 chu India mi, mi dang 59 chu Myanmar mi an ni a, kuminah February thla thlengin India mi 42 leh Myanmar mi 18 an man tawh bawk. Hengah hian raltlan an awm lo tih an sawi.
India mi an tih hian Mizoram mi leh state dang mi an ni a, Myanmar mi an mante hi raltlan an ni lo a, an mi manteah raltlan leh raltlan lo thliar hran ni lo mah se an address atangin raltlan an ni lo tih a lan thu police-te chuan an sawi.
“Ruihhlo a hluar a, raltlan an lo awm bawk nen, rinthu a darh ta a nih hmel a, rinhlelh sana a lo awm bawk niin a lang,” police officer pakhat chuan a ti.
Ruihhlo chungchangah Myanmar mi man tur an awm tih a sawi a, raltlan awm hma pawhin chutiang chu an awm a, raltlan awm hnuah pawh an awm tia sawiin, chu chu raltlan nena ngaihpawlh tur a nih loh thu a sawi. “Myanmar mi tih vangin raltlanah kan puh vek tihna te pawh a ni thei,” a ti.