Japan an chak chiang, an dinhmun a tha

Football a khawchak palian Japan chuan Pathianni zing khan World Cup 2026 khelh meka an match hnihna an khel a, 4-0 ngawtin an khingpui Tunisia an sawp. Khelh hnih atanga point li hmuin Japan dinhmun a tha hle. Group F a inkhel dangah Netherlands in Sweden an sawp ve bawk.
Japan an kal zel
Football-ah hmasawn tuma thathawh nasa, hma pawh sawn chak tak Japan hian World Cup 2026-a an match hmasa berah Netherlands lakah mit la taka inlanin, tlawm an lo pumpelh tawh tawh a. A vawi hnih khelhnaah tha leh zuala inlanin hnehna lian an chang a, point thum an hmu.
Japan hian Sweden laka mualpho tawh Tunisia lakah bul an tan tha viau a, inkhel tan atanga minute lina lekah Daichi Kamada chuan hmahruaina goal a thun nghal. Hma taka goal an thun vangin an phur a, Samurai Blue hi an khel tha zui viau nghe nghe.
Game thunun chungin goal thun belh thei bik lo mah se Japan tan Ayase Ueda chuan minute 31-naah an goal hnihna thunin an hmahruaina a tizau.
Chawlhlawk hmaa goal hnih thun tawh Japan in Tunisia an chungtlak chhunzawm zel a, chawlhlawk hnu lamah goal hnih an thun belh leh. Junya Ito-a’n minute 69-naa an goal thumna a thun hnuin an goal hnihna thuntu Ayase Ueda chuan minute 83-naah an goal lina thunin an chakna a nemnghet. Ueda goal thun hnuin goal dang a luh belh thei lova, Japan chuan 4-0 ngawta hnehna changin last 32 an hnaih ta hle.
Japan hian khelh hnih atangin point li an hmu a, goal difference-ah +4 lai a nih bawk vangin last 32 lut ngei tura ngaih an ni. Group match a an khingpui hnuhnung ber tur chu point 3 hmu awh Sweden an ni a. Sweden nen hian Zirtawpni zing dar 4:30-ah an inhmachhawn dawn a, an chak a nih chuan group leader nih theihna hun tha an nei ang a. Sweden nen an inhnehtawk a nih pawhin last 32 an lut ang a, an tlawm a nih pawhin last 32 lut turin a dinhmun a tha thawkhat viau tho bawk.
Japan dinhmun a tha a, last 32 an luh ngei a rinawm laiin Tunisia erawh chuan World Cup 2026-ah zin kawng duhawm lo tak an zawh chhunzawm a, mangchhia mang zui zelin an tla chiang der tawh. Tunisia hi Sweden lakah 5-1 ngawtin an tlawm nghal phal a, Japan lakah 4-0 ngawtin an tlawm zui leh a, point an la hmu ve lo. Point an la hmuh loh mai bakah goal difference-ah -8 zet a ni tawh. Netherland hmachhawn zui leh tur an ni a, an match hnuhnung berah chakin, point thum hmu bawk mah se Japan leh Netherlands in point 41 ve ve an hmu tawh a. Point thum hmu mek Sweden chu head to head-ah an elphak lo sa bawk a, an tan last 32 luh beisei theihna kawng a ping vek tawh a. Zirtawpni atangin an puanthuah an tel fel nghal nalh dawn.
An match hmasa berah Sweden laka an mualpho vangin Tunisia chuan an head coach Sabri Lomouchi an ban a, World Cup-ah coach ban hma ber an ni. Lomuachi hmunruak luahtu atan World Cup-ah Morocco leh Saudi Arabia lo kaihruai tawhtu Herve Renard an la lut. Renard hnuaiah hmasawn tum viau mah se siam tharna chang hman lovin World Cup 2026 an mangtha mai a ngai ta thung a ni.
Netherlands an chak awlsam
Group F a inkhel dangah Netherlands chuan an khingpui Sweden chu 5-1 ngawtin an sawp a, awlsam taka chakin point thum an hmu. An khelh hmasak berah 5-1 ngawta Tunisia sawptu Sweden chu 5-1 a sawp letin an awm a, Netherlands lakah an mualpho.
Netherlands hian an group a hmahruaitu ni mek Sweden lakah bul an tan tha viau a, goal an thun hma hle. Gody Gakpo siam tha tak chu Brian Brobbey chuan hnaite atangin a pet goal a, minute 5-na lekah hmahruaina goal a thun nghal. Goal hmahruai thuntu Brobbey hian minute 17-na lekah an goal hnihna a thun zui leh a, 2-0 a hmahruai chungin chawlhlawk an hmang.
Chawlhlawk hnu lamah Netherlands an khel tha chhunzawm a, Cody Gakpo chuan minute 47-na leh minute 54-naah goal a thun a, gial hnih ngawtin an hmahruaina a tizau 4-0 ngawt an hnufual hnuin Sweden tan Anthony Elanga chuan minute 59-naah goal thunin an si phurh a sut then. An si phurh sut then bawk mah se Netherlands tan Crysencio Summerville chuan minute 89-naah an goal ngana a thun zui leh a, 5-1 ngawtin an chak zui ta a ni.
Netherlands hian tla chiang tawh Tunisia an hmachhawn zui leh dawn a, Group champion an nih ngei a rinawm. 5-1 ngawta mualpho Sweden pawhin last 32 luh theihna hun remchang an la nei tha viau bawk.