Japan, Spain leh Netherlands Quarter-final an lut,

Women’s World Cup khelh mekah Inrinni leh Pathianni khan last 16 khelh a ni a, Japan, Spain leh Netherlands ten hnehna changin quarter-final an lut.
Japan 3-1 Norway
Inrinni khan Japan leh Norway te chu Wellington Regional Stadium-ah quarter-final luh inchuhin an inhmachhawn a. First half-ah goal hnih ve ve an thun hnuin chawlhlawk hnu lamah Japan an chungnung a, 3-1 a hnehna changin quarter-final lut hmasa ber an ni.
Japan leh Norway te hian inhnehtawk takin bul an tan a, inkhel hmuhnawm an lantir. Inkhel tan atanga minute 15-naah Japan an vannei a, Norway player Ingrid Syrstad Engen chuan an lamah a ti-goal a, Japan hmahruaina goal a thunsak. An chetsual vangin goal chhuah mah se Norway an insiamtha thuai a, an si phurh sutna goal an thun thuai. Minute 20-na lekah Guro Reiten chuan goal thunin an si phurh a sut zui nghal. Hma takah goal khat ve ve an thun hnuin chawlhlawk hmain goal dang an thun belh thei lo ve ve a, 1-1 a inhnehtawk chungin chawlhlawk an hmang.
Chawlhlawk hnu lamah Japan an khel tha chhunzawm a, goal an thun leh thuai. Minute 50-naah Risa Shimizu chuan hma an hruai let lehna goal a thun. Goal thun tuma an innawr tawn viau hnuin hun tawp dawn hnaih minute 81-naah Hinata Miyazawa chuan Japan goal thumna thunin an chakna a nem nghet. Hun tawp thlengin goal dang a luh belh thei tawh lova, Japan chuan hnehna pawimawh tak changin quarter-final an lut zui ta a ni.
Spain 5-1 Switzerland
Group stage an khelh hnuhnung berah si li fai ngawtin Japan ngam loh mah se last 16-ah Spain an insiamtha a, an khingpui Switzerland chu 5-1 ngawta hnehnin a thiam zual pariat zingah an inhlangkai.
Spain hian Switzerland lakah bul an tan tha viau a, inkhel tan atanga minute ngana lekah Aitana Bonmatí chuan hmahruaina goal a thun nghal. Hma takah goal thun mah se an chesual thuai thung a, minute 11-naah Laia Codina chuan an lamah a ti-goal palh a, Switzerland si phurh a sut sak.
Goal khat ve ve an thun hnuin Spain an insiamtha a, na taka an khingpuite nawrin, goal an thun belh leh thuai. Minute 17-naah Alba Redondo chuan hma an hruai nawn lehna goal a thun a. Hmahruaina goal thuntu Aitana Bonmatí chuan minute 36-naah an an goal thumna a thun a, minute 45-naah Laia Codina chuan an goal lina a thun zui leh a, 4-1 hmahruai chungin chawlhlawk an hmang.
Chawlhlawk hnu lamah an si phurh sut tumin Switzerland in thapui an thawh a, thih tha tak meuh meuhin tan khawh bawk mah se an si phurh an sut thei lo. Japan bawk che fuh hma zawkah an tang leh a, Jennifer Hermoso chuan minute 70-naah an goal lina a thun a, an chakna a nemnghet a, last 16-ah hnehna lian changin quarter-final an inhlangkai.
Netherlands 2-0 South Africa
Group E champion Netherlands chuan Sydney Football Stadium-ah South Africa an hmachhawn a, si hnih faia hnehna changin quarter-final an lut.
Netherlands tan hian minute 9-naah Jill Roord chuan hmahruaina goal a thun nghal mai a, an goal hnihna hi minute 68-naa Lineth Beerensteyn thun a ni thung.
USA an tla
Inrinniah Japan, Spain leh Netherlands ten hnehna changa quarter final a luh laiin Pathiannia inkhel hmachhawn USA chu Sweden lakah an vanduai a, an trophy kawl mek hum zo lovin an tla.
Champion lai Sweden leh Sweden te hi hun pangngai leh hun pek belhah awm lovin an inhnehtawk a. Penalty shootout-ah USA hi 4-5 in vanduai zawkah an tang a, quarter-final lut zo lovin an puanthuah an tel ve ta a ni.