Jay-Z pawh Sean ‘Diddy’ Combs thubuaiah a inpal hnawk ve dawn a ang khawp mai, hmeichhe pakhat-in 2000 khan tleirawl kum 13 mi chauh a nih laiin Sean ‘Diddy’ Combs leh Jay-Z ten an pawngsual niin a puh a, a hming lemah ‘Jane Doe’ tih hmangin court-ah Jay-Z leh Diddy te hi a khing a ni.
Sean ‘Diddy’ Combs chu hetiang inpuhnaah hian a talbuai mek tih kan hre sa tawh a, mi chi hrang hrang atangin puhna a tawnga, amah pawh tunah hian jail-ah khung mek a ni. Hetiang karah a hming a rawn lang ve ta Jay-Z hian hminglem hmanga amah puhtu nihna puan turin court-ah ngenna a theh lut ve leh ta a ni.
Jay-Z ukil Alex Spiro chuan Jay-Z chuan hetianga inpuhna hi tihtawp emaw, a puhtu nihna puan chhuah emaw hi a phut niin a sawi a, Jay-Z hmingtha sa tihhmelhem tumna mai mai a nih thu sawiin, Jay-Z, kum 55, chu hetiang lam kaihhnawiha hminghliauna pawh la nei lo a nih thu a sawi bawk.
Jane Doe civil suit-ah chuan 2000 MTV Video Music Awards semna, New York-a neih zawh hnua house party-ah Combs leh Jay-Z te hian an pawngsual niin a tarlang a, hethil thlen lai hian kum 13 mi lek a la nih thu a tarlang bawk.
Jay-Z chuan he puhna hi a pha nasa hle a, thuchhuah siamin hetianga sualna rapthlak takah hi chuan civil mai ni loin criminal complaint theh luh ngei tur ni a a ngaih thu sawiin, “Heitianga naupang kumtling lo chunga pawi khawihtu hi chu khung bo vang vang tur a ni tih kan pawm vek a ni lawm ni? A tuartu nia insawi hian hetiang hi a tawk tak tak a nih chuan a pawi khawihtu chuan a phu tawk hremna a hmu ngei tur a ni,” a ti.
Jay-Z-a’n pawngsuala puhtu hming thup lo turin ngen
Get real time updates directly on you device, subscribe now.