JB-a’n IG-ah a nupui a unfollow zuk!

JB-a’n IG-ah a nupui a unfollow zuk!
Niminpiah khan Justin Bieber chuan a nupui Hailey Bieber chu Instagram-ah a unfollow tlat mai a, fans lam ngaih a tha lo hman hle a, an nupa inkarah boruak a tha lo a awm ni a ngai an tam hman khawp mai.
Social media lamah zawhna a tam hman hle a, hei hi Justin Bieber chuan rawn sawi fiahin, “Tuemawin ka account a lo khawih a ka nupui a lo unfollow a ni,” a ti a, tunah chuan IG-ah Hailey hi a follow leh tawh e.
Tun weekend kalta mai khan an nupaa ice-skating date a induh hmel taka kut inchelha an awm lai thlalak te an post hlim deuh hlawl kha a ni a, IG lama an in-unfollow ta thut mai chuan fans a barakhaih riau a ni.
Justin leh Hailey te hi 2018 khan inneiin, August 2024 khan fapa Jack Blues an nei a, hmanni lawkah an chhungkuain Aspen lamah hlim takin an zinho a nih kha.
Justin hian kum li vel zet chu hla thar a nei tawh lo a, 2022 khan Ramsay Hunt syndrome a neih thu a puang a, a hmai khing a chawmawlh vek a nih kha. A album hnuhnung ber ‘Justice’ chu 2021 khan tlangzarhin, Billboard 200 (albums) chart-ah kar hnih a No.1 a, chumi hnuah rimawi khawvelah a thawm a reh ta riau a ni.
Tunlai hian recording a ti leh tan niawma ngaih theih turin studio-a a zai lai tlalak leh a computer-a hla a buaipui lai thlalak te pawh a tichhuak leh ta e.