JCM-in hnatlang ko dawn loLirtheia eizawngten phut nei
JCM-in hnatlang ko dawn lo
Lirtheia eizawngten phut nei
National Highway 306 Sairang to Kawnpui kawng thawmthat mek dan an enin Joint Civil Society of Mizoram chuan kawng siam hnatlangpui koh an tum chu ngai rih loah an ngai. Hetihlai hian lirtheia eizawngtu pawl hrang hrang inhmukhawm chuan NH 306& 06 bakah NH 108 (Sairang to Langkaih) chu July 30 ralhmaa tlan nuam tawka siam a nih loh chuan hma an la dawn tih an sawi.
Joint Civil Society of Mizoram (JCM) hian July 21 khan darkar 48 chhunga Kawngpui – Sairang inkar kawng thawmthat kawngah hma lakna rintlak an hmu lo a nih chuan ‘Zoram Hnatlang’ koh an tum tih an lo sawi tawh a. Darkar 48 a ral hnu, July 24 khan kawng hi endik leh a, NHIDCL leh Mizoram sawrkarin kawng thawmthatna tura hma an lak tawh chin leh an ruahmanna an hmuhin hnatlang koh rih ngai loa an hriat thu an sawi.
‘Hnatlang tura lo inpeih sa, a tul anga sum leh pai, tha, hmanrua leh lirthei thawh tura lo inkau sa zawng zawng leh mahni awmhmun atanga min lo thlawptute chungah lawmthu kan sawi a ni,’ an ti.
Kumtin maia fur laia kawngpui kal hleihtheih loha a awm ziah thin chu sawrkar inthlahdah vang leh remruatna fel awm loh vang nia an ngaih thu sawiin, ‘Kan kawngpui pawimawh, NH 306 & 06 hi lirthei tlan theihna atana enkawl reng tur leh a siamthat hna pawh chak taka kalpui zel turin NHIDCL kan phut a. Hetiang bawk hian Mizoram hmun hrang hrang, a bikin NH 44A Darlak leh Tuidam inkar, Mamit leh Bairabi inkar, Mizoram chhim lam leh khawchhak lama kawngpui chhe tak takte pawh siamtha chunzawm zel turin Mizoram sawrkar kan ngen a ni,’ JCM hian a ti.
Hetihlai hian lirtheia eizawng pawl hrang hrang thukhawm chuan NH 306 (Sairang to Kawnpui), NH 06 – (Sairang to Buichali), NH 108 (Sairang to Langkaih), NH 6 (Kolasib to Bairabi) chu lirthei tana zawh hlauhawm khawpin a chhia tih sawiin, heng kawng hi NHIDCL leh Mizoram sawrkarin July 23-30 inkar hian tlan nuam tawka an siam an phut a, hemi chhunga an harsatnate phuhru tura kawng siam a nih loh chuan an thiam dan angin hma an la dawn tih an sawi.