Jeff Bezos-a’n a la let leh ta

Elon Musk hnen atangin khawvela mihausa ber nihna chu Jeff Bezos-a’n a la let leh ta. Musk hausakna hi a Tesla Inc. share hlutna 7.2%-in a tlahniam a, tihian Elon Musk hausakna chu dollar tluklehdingawn 197.7 a ni ta a, dollar tluklehdingawn 200.3 nei Jeff Bezos, kum 60, chu khawvela mihausa ber a ni ve leh ta a ni.
Amazon founder Bezos hi tunhma pawhin khawvela hausa ber a lo ni fo tawh a, a nupui nen a inthen hnuah a nupuiin a hausakna dollar tluklehdingawn 30 chuang zet a chhuah hnu leh Elon Musk-a hausakna lo pung bawk nen 2021 atang khan Elon Musk chu khawvela hausa ber a ni ta a, tunah Musk-a hausakna tlahniam ve lehin Bezos hian a rawn lehpel ve leh ta a ni.
Musk, kum 52, hi a hausak vanglai chuan Bezos nena an inthlauhna hi dollar tluklehdingawn 142 te pawh a tling hman a, mahse, tunhnaiah Amazon share hlutna a pung chak hle a, chutihlaiin Musk-a sum hnar Tesla share hlutna a lo tlahniam ve hret hret bawk a, an inlehthal leh ta a ni. Amazon share hlutna hi 2022 atang khan a letin a pung a, chutihlaiin Tesla hlutna hi a vanglai 2021 aiin 50% vel zetin a tlahniam ve thung.
Jeff Bezos sum hnar lian ber cu Amazon-a a 9% stake niin, he online retailer-a shareholder lian ber a ni a, 2017 khan Microsoft Inc co-founder Bill Gates lehpelin khawvela hausa ber a lo ni tawh a, mahse, Tesla share hlutna puang chak avangin Musk-a’n 2021-ah a rawn lehpel ve leh ta a ni a, 2021 hnuah tun hi khawvela hausa ber a nih leh vawi khatna a ni.
Khawvela hausak lama pathumna chu LVMH Moet Hennessy Louis Vuitton chairman, Bernard Arnault, kum 74, niin a hausakna hi dollar tluklehdingawn 197.5 a tling. Anni hi kawvela luxury-goods siamtu lian ber an ni.