Jelly Roll ‘Beautifully Broken’ a No.1

Jelly Roll ‘Beautifully Broken’ a No.1
Jelly Roll album ‘Beautifully Broken’ chu Billboard 200 (albums) chart-ah a No.1 a, he chart-a a album No.1 kai thei hmasa ber a ni. Hetihrual hian Rod Wave, GloRilla leh BigXthaPlug te pawh top 10-ah an debut e.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna baka streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Jelly Roll ‘Beautifully Broken’ hi kar khat (Zirtawpni – Ningani) chhungin US-ah 1,61,000 an hralh thei a, chung zinga 1,14,000 chu album tak tak hralhna niin, streaming atangin 44,000 (on-demand official stream maktaduai 58.86) niin, album-a hla mal hralhna atangin 3,000 a tling thei bawk. Album-a hla a mala 10 hralh leh album pakhat hralh intluka chhut a ni.
‘Beautifully Broken’ album hi hla 14 awmna niin, expanded album hla 22 awmna leh deluxe edition hla 27 awmna te pawh a awm a. He album-a hla ‘I Am Not Okay,’ ‘Lonely Road’ (featuring MGK) leh ‘Liar’ te chu Hot 100 chart-ah paw an lo lang tawh. Jelly Roll hian 2023 khan a album ‘Whitsitt Chapel’ chu chart No.3 a lo kaipui tawh bawk a, he chart top 10-a lang thei album pahnih a nei ta a ni.
Rod Wave album ‘Last Lap’ chu 1,27,000 hralhin No.2-ah a debut a, 1,25,000 chu streaming atanga album tlukpui (on-demand official stream maktaduai 173.35) niin, album tak tak hralh chu 2,000 a ni a, hla mal hralhna chu belh tham loh a ni ve thung. Rod Wave hian chart top 10-a lang thei album pasarih a nei tling ta a, chung zingah album pathum chu No.1 kaiin, No.2 kai thei pahnih a nei tawh bawk.
Charli XCX album ‘Brat’ chu 1,05,000 hralh lehin No.14 atangin No.3 a kai thar leh a, ‘Brat’ album hi a deluxe version a tlangzarh thar a, hei hian hralh a tipung leh ta a ni. He album hi June thla tira a tlangzarh kha niin, chart No.3-ah tho hian a lo debut tawh. Chart No.1 hlui Sabrina Carpenter ‘Short n’ Sweet’ chu 85,000 hralh lehin No.2 atangin No.4-ah a tawlh ve thung.
GloRilla album ‘Glorious’ chu 69,000 hralhin No.5-ah a debut a, 56,000 chu streaming atanga album tlukpui (on-demand official stream maktaduai 77.98) niin, album tak tak hralh chu 12,000 a ni a, album-a hla mal hralhna atangin 1,000 a tling thei bawk. No.5 hi he chart-a GloRilla tawn san ber a la ni.
Chappell Roan ‘The Rise and Fall of Midwest Princess’ chu 55,000 hralh lehin No.3 atangin No.6-ah a tawlh a, Billie Eilish ‘Hit Me Hard and Soft’ chu 50,000 hralh lehin No.5 atangin No.7-ah a tawlh ta bawk.
Rapper BigXthaPlug pawh a vawi khat nan chart top10-ah langin, a album thar ‘Take Care’ chu 48,000 hralhin No.8-ah a debut. A album hralh hi 46,500 chu streaming atanga album tlukpui (on-demand official stream maktaduai 62.77) niin, album tak tak hralh chu 1,500 a ni. Tun hi he chart top 10-a a lan vawi khatna niin, a hmain a album ‘Amar’ chu No.97 kaiin, ‘The Biggest’ chu No.111 a kaipui tawh bawk.
Chart top 10 khartu album pahnih chu chart No.1 hlui ve ve niin, Morgan Wallen ‘One Thing at a Time’ chu 48,000 tling lo deuh hralh lehin No.4 atangin No.9-ah a tawlh a, Taylor Swift ‘The Tortured Poets Department’ chu 44,000 hralh lehin No.6 atangin No.10-ah a tawlh ta bawk.