Jharkhand sorkarin ni 24 hnuah zirlaite phut tihsak ta

Jharkhand sorkarin ni 24 hnuah zirlaite phut tihsak ta
Zirlaiten hna lakna tur examination buatsaihah dik tawk lo a awm nia lungawi lohna an lantir mekah an thil phut lian ber, JSSC-CGL examination leh mi mal firm, Jharkhand Police-a Crime Investigation Department (CID)-in an thlithlai mek, TDPL-in examination a buatsaih dang zawng zawng chu cancel vek turin Jharkhand sorkarin a pawm ta.
Exam buatsaih tawh cancel leh tura thutlukna hi zirlaiten an nawr ni 24-na leh thenkhatin ni 14 chaw an nghei hnua siam a ni a. Chief Minister Hemant Soren-a kaihhruaia rei tak cabinet an thutkhawmnaah pawm a ni.
An thutkhawm zawha state secretariat-a an thutlukna a puannaah Soren-a chuan, “CID leh SIT ten an chhuinaah thil hai chhuah tan mek a ni a. Cabinet thutkhawma ngun taka sawihova inrawn a nih hnuah JSSC CGL chu cancel turin thutlukna siam a ni ta a. TDPL-in exam a buatsaih tawhte pawh cancel a ni ang,” a ti.
Chief minister chuan CID chu kum 2014 hnu alma hna lakna tura exam buatsaiha dik tawk lova thil tih a awm em tih chhui vek turin a ti bawk.
TDPL hi mi mal agency niin 14th JPSC civil services prelims examination bakah civil services backlog examination pahnih nen exam hrang hrang a lo buatsaih tawh thin a. Combined Graduate Level (CGL) examination chu Jharkhand Staff Selection Commission (JSSC)-in kum 2024-a a buatsaih niin a beitu 1,800 velin hlawhtlinna changin state sorkara department hrang hrangah an thawk tawh hlawm.
Lungawi lohna hi CID-in July 22-a JPSC-in kumina 14th civil services prelims exam a buatsaiha dik lo awm thubuai a ziah luh atanga intan a ni a. Agency hian mi 21 an man tawh zingah JPSC chairman hlui, L Khiangte pawh a tel a. TDPL director leh executive-te leh JPSC exam-a dik lo taka tihnaa inrawlh dangte an tel a. Chhuinaah hian JSSC CGL exam-a TDPL telna pawh chhui tel zel a ni.
Hna zawng mekte chuan Ranchi-a Jaipal Singh Munda Stadium-ah lungawi lohna an lantir tan ta a, thenkhat chuan chaw an nghei a. August 10 khan Vidhan Sabha panin kawng an zawh a, Ningani hian chief minister chenna ina kal leh tumin an inruahman lawk tawh bawk.
An duh langsar pahnih, TDPL buatsaih ezam leh JSSC-CGL examination cancel chu tihhlawhtlinsak ni dawn mah se CBI chhuitir an phutna chu engtin nge ni zel dawn a la hriat loh.
Thil dik lo chhui chungchangah chief minister chuan, “Hna tan a nih atang khan a pum puia thlirin tha taka thawh zel a ni a. CID chu kum 2014-a exam buatsaih chin atang khan dik lo awmte chhui vek turin ka ti a ni,” a ti.
Hna lakna exam kalphung siam that kaihhnawihah chief minister hian IAS officer hlun tak, Amitabh Kaushal-a kaihhruai committee dinin examination kalpui dan zir chiangin felhlel awm theite a awm tawh lohna tura kal dan tha zawk tur rawt tura tih an nih thu a sawi.
An thil phut lian tihhlawhtlinsak an ni dawn tih puan a nih rual hian Jaipal Singh Munda Stadium-a zirlai lungawi lo pungkhawmte chu lawmin an sahawk nasa hle a. An kal zel dan tur hriat theih a la ni rih lo.