J&K-a Khamenei-a thihna lungawi loh lantirnaah mi 14 hliam
J&K-a Khamenei-a thihna lungawi loh lantirnaah mi 14 hliam
US leh Israel tang dunin Iran an beihnaa an Supreme Leader Ayatollah Ali Khamenei-a’n thah hnua Jammu & Kashmir-a lungawi lohna huaihawt ni hnihnaah mi 14 an inhliam a, venhim hna thawktu paruk an tel niin thuneitute an sawi.
Thuneitute chuan fimkhurna atan union territory-ah hian mipui chetvelna a khuahkhirh a, zirna inte pawh khar a ni a, mobile internet chak zawng pawh tihmuan a ni bawk.
Thuneitute sawi chuan Kashmir Valley-a hmun hrang hrangah punkhawmna 75 huaihawt a ni a, Jammu bial-ah pawh kawngzawh an awm bawk a. Srinagar-ah chuan thuneitute chuan Lal Chowk chu kawng dalna hmangin an khar a, hei hi khawpui lailiah Khameinei-a thah a nih avanga nawrh huaihawt a nih tuk atangin a ni tih an sawi a. Venhim hna thawktu dah pawh tihpun a nih bakah hmun pawimawh bikah police leh paramilitary force dah belh a nih thu an sawi.
Khuakhirhna kalpui mek ni mah se Valley hmun thenkhatah nawrh huaihawt tho a ni a. Srinagar-a Bemina, Jehangir Chowk, Shalteng leh Gund Hassibhat-ah te; Budgam leh Pattan-ah huaihawt a ni.
Lungawi loh lantir huaihawt tam zawk hi a tlangpuiin remna zawnga kalpui a nih laiin hmun tlem têah buaina a chhuak niin thuneituten an sawi a. Valley-a buaina chhuak zingah hian mi 14 – nawrh huaihawttu mi pariat leh venhim hna thawk mi paruk an inhliam tih an sawi.
“Srinagar-a Bemina leh Shalteng-ah leh hmun thenkhatah lungawi loh lantirna huaihawt tenau a awm a, thenkhat chu mittui tlakna hmanga hnawh darh an ni a. Budgam-ah pawh lian tham lova pun khawm huaihawt a ni bawk,” tiin police officer pakhat chuan a sawi.
Pathianni khan ram pumah mi sang tam takin kawngpuiah Shia hruaitu thihna hi an sunna an lantir a. Thawhtanni khan Karnataka-a eptu hruaitute chuan Khamenei-a thlawpna atana kawngzawh huaihawt chu state chhungah an phal loh tur thu an puang.
“Khamenei-a hi dictator a ni a, a chhungril lamah helna rilru a pu a, chuta chhuak chuan hmeichhiate chungah pawikhawihna nasa tak a thlen a, mi sang tam tak kah hlum an ni a. Chuti chung chuan India ram hmun tam takah, Bengaluru telin, Muslim-te chuan Khamenei-a duh zawngin nawrh an huaihawt a ni,” tiin BJP hruaitu leh Karnataka assembly-a Leader of Opposition R Ashoka-a chuan a sawi.