Leilung hausakna vâng chi hai chhuak turin India-Japan inbia

Leilung hausakna vâng chi hai chhuak turin India-Japan inbia
Japan chuan India nen tangkawpin Rajasthan thlalera ram leilung hausakna vâng chi hai chhuak turin an inbe mek niin sawihona hrechiangtu pahnihin an sawi a, hei hi Tokyo-in thirhipthei (magnet) siamna atana pawimawh hmanruate China-a a innghahna tihtlem a tum vang a ni.
Thla hmasa khan India Mines Minister G. Kishan Reddy-a chuan India khawthlang lama Rajasthan leh Gujarat-ah leilung hausakna vâng chi awmna pathum, oxide metric ton maktaduai 1.29 awmna hmuhchhuah a nih thu a lo sawi tawh.
Nikuma Japan leh India-in leilung hausakna pawimawh tak taka thuthlung hmasa ber an ziah hnuah Tokyo chuan Rajasthan-a awmte hi a duh thu a sawi a, he hmunah hian mi thiamte tirh a tum niin inbiaknaa telte chuan an sawi a. An sawihona chu vantlang hriata puan a nih loh avangin an hming sawi lang duh lo.
Mi thiamte chu engtikah nge an thlen dawn tih pawh an sawi rih lo bawk.
Rajasthan-ah hian Japanese sorkar chuan an rama lak luh tur leilung hausakna vâng chi lak chhuahna tura technology pek bakah sum a pek a tum dawn nia sawi a ni a, heng lung chang chi awm la chhuak tur hian India-in a neih loh loh lak chhuah thiamna bik a mamawh thu a sawi bawk.
Japan chuan a vâng chi telin leilung hausakna chi laih chhuahna hrang hrangte chu a enfiah mek tih Japanese Ministry of Economy, Trade & Industry (METI) Deputy Director Naoki Kobayashi chuan Reuters a hrilh a, Rajasthan chungchang bik erawh sawihona a awm lo tih a sawi thung.
Japan ang bawkin India hian Chinese thil lakluh a innghahna tihtlem a duh a, leilung hausakna vâng chi sawngbawlna thlenga neih theih a duh a, hetah pawh hian Japan a tul anga thiamna a pe thei bawk.
Leilung hausakna vâng chite hi electric lirthei, thli atanga power siamna virmep lian, indo thlawhna leh drone-a hman thin niin khawvela economy thang chak ber, India tan chuan a pawimawh hle a ni.
Kar hmasa khan China chuan vantlang leh sipai thila hman theih tur thil, Beijing-in Japan sipaite hnena a hralh thin chi 20-te thawnchhuah a khap a, hei hian Tokyo a tihbuai zual phah.
Hei hian Japanese company-te chu China-in thawn chhuah a khap zinga tel leilung hausakna vâng chi pasarih leh a kaihhnawih thil pasarih atangin a titawp a, a dang tam tak a titawp bawk.
Leilung hausakna vâng chi bakah hian Japan chuan Africa-a lithium, darsen leh cobalt te dap turin India company-te nen thawhhona an dap mek niin thu dawnna pakhat chuan a sawi.