J&K-a LoC-ah Pakistani drone panga hmu, sipaiten kap

J&K-a LoC-ah Pakistani drone panga hmu, sipaiten kap
Indian Army chuan Pathianni tlai thim hlim khan Jammu & Kashmir-a Nowshera sector, Line of Control (LoC) bulah Pakistani drone an kap a, drone dang pawh an hmu nual bawk.
Video darh pakhatah chuan zan thim takah tracer round che vel pawh hmuh theih a ni a, nikuma Operation Sindoor hnuah hetiang thil hi hmuh tur a awm vak tawh lo va, eng ang thila chetna nge tih chhui zui nghal mek a ni.
Sipaite chuan drone an hmunte hian ralthuam nge ruihhlo an thlak tih hriat tumin an zawng zui nghal bawk a. Inrinni pawh khan Pakistan-Occupied Kashmir (PoK) atangin drone hmangin Samba sector-ah ralthuam thlak hmuh a lo ni tawh.
Sipaite chuan Pathianni zana drone an hmuh hi machine gun hmanga an lo kah thu an sawi.
Rajouri district-ah pawh tlai dar 06.35-ah drone dang hmuh a ni bawk a. He drone hi Dharmsal khua, Kalakote atanga hmuh niin Bharakh lam a pan niin thuneitute chuan an sawi.
Drone ang chi tho, eng siam thei pawh Chak Babral khua, Ramgarh sector, Samba-ah zan dar 07.15-ah hmuh a ni bawk a. Drone ang chi tho a dang pawh Tain atangin Topa, Mankote sector-ah hmuh a ni bawk a, hei hi tlai dar 06:25 velah niin LoC hrul, Poonch district-ah hmuh a ni.
India hian nikuma Operation Sindoor lai khan Pakistani drone eng emaw zat a kap thla a. He mi hnuah hian drone hmuh tur hi a tam tawh lo hle a, hetih lai hian Pathianni bikah khan Pakistani drone ni ngeia ngaih panga lai hmuh a ni leh ta a ni.
Pakistan atang hian India-ah ralthuam leh ruihhlo phurh luh nan drone hi hman a ni thin a. Heng thil hi Delhi chuan Islamabad-in a puih firfiak pawlten an tih niin an sawi thin a ni.