Bangladesh atanga balloon thlawk Cachar-a tlain mi tichiai

Bangladesh atanga balloon thlawk Cachar-a tlain mi tichiai
Assam-a Cachar district-ah Bangladesh atanga boruakalhthei hmanga thlawh chhuahtir balloon chhar a ni a, mi a tichiai hle.
Police chuan balloon-ah hian Sylhet, Bangladesh-a Ghilachhara Dwimukhi High School hming a inziak a, Cachar-a Borkhola-ah a tla hi chhar a ni tih an sawi.
Tual chhung mite chuan balloon an hmuh ngai loh ang chi taka lian em em an hmu a, lovah tlain mi tam tak a en turin an tlan khawm a. Village Defence Party (VDP) an hrilh zui a, anni hian police an hriattir veleh chhawng tih an sawi.
Police team-in a hmun an thleng a, Senior Superintendent of Police, Cachar Partha Pratim Das pawhin a zui a. An thlen lai pawh hian a hmunah hian mi tam tak an la awm khawm a ni.
Balloon-ah hian sikul hming a inziah bakah mi pathum thlalak a awm tel a, Bengali tawngin thil a inziak bawk tih police chuan an sawi.
Police hian engtin nge balloon hian ramri a kân theih an chhui zui mek a, himna atana thil hlauhawm a ni thei em tih pawh an en zui nghal mek a ni.
Tun hnaiah India leh Bangladesh hi an inkar a tha lo hle a. Mipuiin an paih thlak, prime minister hlui, Sheikh Hasina-i India-a a tlanchhiat hnua Dhaka-in thawn kir tura a tihna a chhan duh loh hnu leh Bangladesh-a Hindu eng emaw zat kut tawrhna a thlen hnuah an inkar hi a tha lo zual hle a ni.
Hetiang karah ramri hrulah Bangladesh atanga balloon thlawh chhuah hmuh a ni hian mipui tihchiai leh ngaihven a hlawh hle a ni.