J&K-ah firfiaka chetna tlahniam nasa
Indian venhim hna thawktuten hma an lak nasat avanga helho chet velna an danchah that avangin kuminah Jammu & Kashmir-ah mi firfiakte chetna a la tlahniam nasa hle a, a bikin Pakistani-te kaihhruai mite an che tlem zual.
Intelligent-te chuan Pakistan-occupied Kashmir (PoK)-a Line of Control (LoC) hrulah mi firfiakte tawm khawmna hmun 42 a la awm a, hengah hian mi 110 atanga 130 vel an awm.
Kashmir Valley-ah firfiak 70 – 75 vel an awm mek a, Jammu, Rajouri leh Poonch district-ah te 60 – 65 vel an awm bawk a. Heng zinga 115 chuang hi Pakistani nia hriat an ni.
Intelligence report-ah chuan thalaite zingah mi firfiakte zawm duh pawh an tlahniam nasa hle a, kuminah tual chhung mi pali chiah firfiakte zawm an la awm nia tar lan a ni a, hei hi Pakistan-in a puih firfiakte chetna tikhawlhkhamtu ber nia tar lan a ni.
Venhim hna thawktute hian kumin chhungin ni nga dan zelah mi firfiak pakhat that ziah ang an ni a. Kuminah 75 that tawhin a tam zawk chu ram dang mi an ni a. Thah zinga 17 chu a rûka LoC leh International Border (IB) kân an tum lai thah niin 26 chu ram chhunga inbeihnaa thah an ni.
Thawhtanniah khan mi firfiak pathum thah leh an ni a, an zinga pakhat hi Pahalgam-a firfiakte chetnaa a bultumtu kha nia hriat niin Srinagar daia sipaiten Operation Mahadev an kalpuiah thah a ni.
Venhim hna thawktuten helho laka beihpui an thlak thin hian nasa takin hel a titawmim a. Ram dang mi firfiak thah 42 zinga a tam ber hi Jammu-a district panga — Jammu, Udhampur, Kathua, Doda leh Rajouri-a thah an ni a. Kashmir-a ram dang mi firfiak that pangate chu Baramulla, Bandipora, Kupwara leh Kulgam-a kah hlumte an ni thung.
Baramulla chu mi firfiakte thih tamna ber hmun niin tum kua beihpui thlakah ram dang mi firfiak 14 thah an ni tawh.
Venhim hna thawktute hian LoC hrula firfiak chet velna tam zualna – Sabura Nala, Kamalkot leh Main Uri sector bakah ram chhunga Chak Tappar Kriri, Sopore’s Nowpora, Hadipora, Sagipora, Watergam leh Rajpore te chu an veng uluk zualin an thlithlai tam zual a ni.
“Tual chhung mi helte chu tun dinhmunah chuan kan tichimit deuh vek tawh a ni,” tiin venhim hna thawktu hotu pakhatin a sawi.
India hian April 22-a Pakistan-a Lashkar-e-Taiba peng, The Resistance Front miten Pahalgam-a civil mi 26 an thah hnuah nasa zawkin helho lakah hian chet a la a ni.
Pahalgam-a firfiak chetna thleng chhang let hian Indian sipaite chuan Operation Sindoor hmangin May 7 khan PoK leh Pakistan-a mi firfiakte tawmna hmun eng emaw zat thlawhna hmangin a kap a. Mi 100 chuang an thi nia hriat a ni.
Kum 2024 chhung khan Jammu & Kashmir-ah hian mi firfiakte chetna tum 60 thlengin mi 122 an thi a. Heng zingah hian civil mi 32 leh venhim hna thawktu 26 an tel.
Tual chhung mite zinga firfiak pawl zawm an tlem zel leh Pakistani hel thah an tam avangin heng lai hmuna himna dinhmun pawhin that lam a pan zel a, Indian sipaiten ramri kâna firfiaka chet tum tam zawk chu an dang thei a ni.