Joe Biden-a’n Hunter chhan dawn lo

US President Joe Biden chuan gun crime thubuaia a fapa Hunter Biden thiamloh chantir chungchangah jury te thutlukna chu a zah tur thu a sawi.
Jury 12 te chuan kum 54-a upa Hunter Biden chu kum 2018 a silai a lei laiin drugs a hman sual a zep tiin thutlukna an siam a. Lung in tang thei niin US history a president ni lai fapa criminal prosecution tawng hmasa ber a ni bawk.
Hunter Biden chu thubuai pathum a neihah thiamloh chantir vek niin chutih laiin a pa President Biden chuan November thla US President thlanna neih turah campaign atan lai mek a ni thung.
Delaware a Hunter Biden chungchang ngaihtuahna neihah Preisdent Biden chu a tel ve lo va, a nupui First Lady Jill Biden erawh a inlan thung a. Hunter Biden nupui leh a farnu bakah a uncle te chuan an telpui a ni.
Court-in thutlukna a siam hnuah President Biden chuan Wilmington, Delaware pan zui nghalin, “President ka ni a, pa pawh ka ni. Jill nen kan fapa hi kan hmangaih a, amah hi kan chhuang a ni,” tiin a sawi. Biden chuan court thutlukna chu an pawm tur thu a sawi bawk.
President Biden chuan a hmain a fapa chu thiamlohchantir ni mah se ngaihdam a tum loh thu a lo sawi tawh a ni.
Hunter thubuai ngaihtuahnaah hian Jurors te chuan a nupui hlui Kathleen Buhle, a bialnu hlui Zoe Kestan te thu zawtfiahin Hunter chuan drugs a khawih nasat thu an sawi ve ve a. A drug hmanna kaihhnawih text leh thlalak te bakah Hunter Biden saruak deuhthaw a thlalak te pawh court ah pholanin a awm a ni.
Court thutlukna chuan politics lamah hlet nei ngalin Congress a Republicans te Hunter Biden chanchin leh sumdawnna te a kum akum chhui chiang tawh te chuan sawi an nei nghal a.
House oversight committee chair James Comer, Republican chuan thutlukna pawimawh tia sawiin mahse ‘Biden corrupt influence peddling scheme’ a inhnamhnawih zawng zawng te chhuichian zui vek ni se a ti.
Trump campaign lam chuan Hunter Biden chungthu ngaihtuahna chu ‘Biden Crime Family te real crime lakpenna mai mai chauh’ tiin an sawi ve thung a. Trump chuan campaign a neihnah Biden Crime Family tih chu deuhsawh nana a hman chamchi a ni.
Congress Deomcrats te thung chuan Republican te chu pawnlma maia that der tumah puhin chutihrual chuan US justice system an fak thung bawk a.
“Republicans leh Democrats tena ngaihdan an neih khaikhin teh u” tiin Maryland Democrat Jamie Raskin chuan sawiin Trump criminal conviction chuangchang sawiin, “Republicans te chuan kan system of justice pum leh rule of law te chu case pakhata thutlukna duh lovin an bei a, chutih laiin United States president fapa thiamloh chantir a ni a, Democrat te phunnawi an awm ve lo” tiin a sawi.
Juror te chuan Hunter Biden chungthu an ngaihtuahnaah politics in hmun a chang lo ti in, “President Joe Biden ka ngaihtuah chhuak lo hrim hrim” tiin Juror pakhat chuan a sawi a. “Juror tin ten tumahin politics thil sawi lang an awm lo,” tiin a sawi bawk.
Hunter Biden chu ni 120 vel chhungin a hremna tihchhuah a ni ang a, kum 25 thleng lung in tang thei a ni a, mahse legal expert te chuan chutiang anga sei chu a tan an ring lo thung. A chhan chu thubuai la nei ngai lo leh tharum thawhlama buaina a nih loh bawk vang a ni.
Hei bakah hian Hunter Biden chuan California-ah income tax awlruk thubuai nei tho bawkin thiamloh chantir a nih chuan kum 17 lung in tan theihna a ni bawk a. He thubuai hi kumin kum tawp lama ngaihtuah tur a ni.