Joe Biden-a’n inhnuhdawh tum lo
US President Joe Biden chuan senior Democrats te atanga nawrna nasa tak karah presidential race atanga a inhnuhdawh loh tur thu a sawi.
Biden chuan Vice-President Kamala Harris nena White House a inhmuhna an neih hnuah Biden chuan presidential election atana a campaign zel tur thu sawiin Harris pawhin a thlawp tlat thu a sawi bawk.
“Democratic Party nominee ka ni a. Tumahin min nawrchhuah an tum lo va, ka chhuak dawn bawk hek lo” tiin Biden chuan a sawi.
“Chiang taka ka sawi duh chu president ka chuh dawn” tia sawi bawkin Biden chuan ‘a tawp thlengin kan bei dawn’ a ti bawk.
Tun hnai lawkah Republican candidate Donald Trump nena an debate-naah kum 81-a upa Biden chu a chetchhiat em avangin Democratic circle chhungah fit tawk tawh lova ngaihna a awm nasa hle a.
Chutihlaiin poll lak hrang hrangah Republican candidate Trump chuan hma a hruai zauh zel avangin Biden lakah pressure a sang tial tial bawk a. New York Times in debate hnua poll an lakah Trump chuan six point laiin Biden chu a khum tawh a ni.
CBS tena poll an lakah thung chuan Trump chuan Biden lakah point thum battleground state-ah hma a hruai bawk a, ram pum huap pawhin Trump chuan hma a hruai bawk.
Chutihlaiin Democratic donor thenkhat leh lawmaker thenkhat te chuan langsar takin Biden chu insaseng turin an ngen bawk a. Ramesh Kapur, Indian-American industrialist Massahusetts a inbun leh kum 1988 atanga Democrats fundraiser langsar tak chuan, “Meichher mi dang a hlan a hun tawh” tia sawi “Phurna chu a la nei a, mahse, Mother Nature chu hneh theih a ni lo” tiin a sawi.
Congress-a Democrats pahnih te pawhin Biden chu insaseng se an duh thu sawiin Representative Raul Grijalva of Arizona chuan New York Times hnenah Democrats te chuan ‘midang an zawn a ngai’ tiin a sawi.
Hetihlai hian White House leh Biden campaign lam chuan 5 November inthlanna neih hunah Trump hneh ngei tumin hma an lak char char thu an sawi thung a ni.
New York Times leh CNN te chuan nilaini khan Biden chuan presiential race-a inhnamhnawih zui zel tur leh tur loh a inngaihtuah tiin an chhuah a. President a chuh lehah tlinglo thei a ni tih a inhria tiin an sawi a.
Hei hi chhangin White House Press Secretary Karine Jean-Pierre chuan thudik lo a nih thu sawiin, He mi chungchang hi President kan zawt a, president chuan thudik lo hul hual a ni tiin min chhang a ni” tiin a sawi.
Biden hian Nilaini tlai lam khan Democratic governor 20 te chu a inhmuhkhawmpui bawk a. Chung zingah chuan presidential race atangin lo inhnukdawk ta se amah thlak thei tura ngaih zinga mi California governor Gavin Newsom leh Michigan governor Gretchen Whitmer te pawh an tel a ni.
“President hi kan thlawp tlat a, amah pawhin min thlawp tlat ang” tiin meeting neih zawh hnuah Maryland Governor Wes Moore chuan a sawi a.
New York Governor Kathy Hochul pawhin president chu an thlawp tlat thu sawiin Biden chuan chakna an chan ngei tur thu a sawi tiin a sawi bawk.
Biden hi inhnukdawk ta thut se chuan amah thlak thei ber tura ngaih chu a Vice-President Kamala Harris a ni a, kum 59 a upa Harris hi a approval rating a chhe hle chungin Biden-Trump debate hnuah Democrats te ah erawh amah thlawptu an pung ta thung.
CNN headquarter a debate hmasa ber zawh hnuah Harris chuan press interview a nei zui nghal a, chutah chuan President Biden chu a thlawp tlat thu a sawi a ni.