Joe Biden leh McCarthy ten inbiakna nei
President Joe Biden leh top Republican Kevin McCarthy te chu, US-in debt ceiling leiba a neih theih zat tihsan a nih theih nan phone hmangin an inbia.
Biden chuan inbiakna tha tak an neih thu sawiin Tokyo atanga G7 summit hmanga US a haw hnuah inbiakna an neih zui leh tur thu a sawi bawk.
Hotu pahnihte hi debt ceiling tihsan a nih theih nana budget cut chungchangah ngaihdan inang lo an nei a. Chin fel a nih loh chuan June thlaah US chu leiba rul thei lo dinhmunah a ding dawn a ni.
Chumi awmzia chu federal sorkar chuan pawisa a puk belh thei dawn lova bill pawh a pe thei dawn lo bawk a. Treasury Department chuan 1 June atangin default a intan dawn der an ti bawk a.
Chutiang chu a thleng tak tak a nih chuan financial market-ah buai nei nuai thleng dawnin lohtheihlohin interest rate tihsanin a awm belh dawn zui a ni.
Japan a pan hma tawhin Biden chuan Republicans tena rawtna an siam te chu ‘a nihna takah chuan tihhlawhtlin theih loh’ tiin a sawi a, Republicans te hian House of Representatives chu an thunun tlat bawk si a.
“Republicans te hian kan pawm tlan ve ve theihin inremna siam theih a ni tih an man fiah a ngai a ni,” tiin Joe Biden chuan a sawi a. Inremna a awm theih nan sum hmanna tura ruahmanna siam tih tlem pawh a inhuam thu a sawi bawk.
McCarthy pawhin Biden nena an inbiakna chu awmze nei tak a ni tia sawiin, “Kan duh a hrechiang a nih chuan harsatna chu chinfel theih a ni,” tiin a sawi.
Pathianni zan khan McCarthy office Capitol Hill-ah darkar hnih leh a chanve chuang inremna a awm theih nana inbiakna neih a ni bawk a. Biden aiawh Steve Ricchetti chuan inremna a awm theih nan inbiakna an neih zui zel tur thu a sawi bawk.
Hetih lai hian Treasury Secretary Janet Yellen chuan 1 June chu ‘hard deadline’ a la ni reng tia sawiin, “inremna siam a nih loh chuan June thla tirah kan leibate kan pe thei dawn lo tan” tiin a sawi bawk.
Debt ceiling hi tihsan a nih loh chuan US chuan social insurance payment te federal leh military employee te hlawh a pe thei dawn lo va. Default a awm chuan global economy a nghawng ngei dawn bawk a, thil man nghawng neiin ram hrang hrangte pawhin an tuar ngei dawn a ni.